“O‘zavtosanoat” AJ monitoring davomida aniqlangan qonunbuzarliklar sabab GM Uzbekistan “Qashqadaryo Avtotexxizmat” MCHJ bilan dilerlik kelishuvini bekor qilganligini ma’lum qildi.
Avtosalon faoliyati, shuningdek avtomobillar saqlanayotgan omborxonalarda aniqlangan qoidabuzarliklar kelishuv bekor qilinishiga olib keldi:
- 2018 yilning yanvar oyidan hozirgi davrga qadar GM Uzbekistan kompaniyasiga jismoniy va yuridik shaxslardan “Qashqadaryo Avtotexxizmat” MCHJ dilerlik korxonasi faoliyatiga doir 420 ta murojaat kelib tushgan. Shundan 117 ta murojaat dilerlik korxonasining mijozlarga nisbatan qo‘pol va haqoratomuz harakatlari va/yoki harakatsizligi bilan bog‘liq. Shuningdek 10 ta murojaatda mijozlar tomonidan “Qashqadaryo Avtotexxizmat” MCHJ xodimining korrupsion harakatlariga oid dalillar keltirilgan;
- avtomobillar sotishni hisobga olishga doir hujjatlar o‘rganilganda dilerlik korxonasi va mijoz o‘rtasida imzolanmagan shartnomalar mavjudligi aniqlandi. Shuningdek shartnomalar va boshqa hujjatlar o‘rganilganda mijozlarning imzolari haqqoniy emas deb gumon qilindi. Ushbu hujjatlarning haqqoniyligini aniqlash maqsadida ekspertiza uchun tegishli idoralarga taqdim etiladi;
- avtomobili hali berilmagan 487 ta shartnomalar o‘rganilganda mijozlar imzosi bo‘lmagan 47 ta shartnoma borligi aniqlandi;
- dilerda mavjud avtomobillar hisob-kitob qilinganda omborda ortiqcha saqlanayotgan avtomobillar mavjudligi aniqlandi;
- avtomobilini kutayotgan ayrim xaridorlarga qo‘ng‘iroq qilinganda ularga avtomobillari salonga yetkazilganligi haqida ogohlantirilmaganliklari aniqlandi. Bundan tashqari, ayrim xaridorlar 2018 yilning 10 sentyabridan 6 noyabriga qadar GM Uzbekistan aksiyasi doirasida “Spark” avtomobilini xarid qilgan xaridorlarga velosipedlar olish uchun vaucher berilmaganligi aniqlandi;
- avtosalonda call-markaz va qo‘ng‘iroq qabul qilish uchun mas’ul xodim bo‘lmagan.
“AS Qashqadaryo Servis” dilerlik markazi avtomobil savdosi bo‘yicha sayyor tekshiruvdan o‘tkazilgan chog‘ida avtosalon faoliyatini tashkillashtirishda hamda mijozlar bilan ishlashda ko‘plab qonunbuzarlik va qo‘pol xatolarga yo‘l qo‘yilganligi aniqlangan.
Tekshiruv natijasida “AS Qashqadaryo Servis” DK rahbari lavozimidan ozod etildi, uning o‘rniga yangi rahbar — Hamroyev Shuhrat Zokirovich tayinlandi. Uning zimmasiga mavjud xatoliklarni to‘g‘rilash, dilerlik markazi faoliyatini sifat va xizmat jihatdan yangi darajaga ko‘tarish topshirildi.
Avvalroq Shuhrat Hamroyev Qashqadaryo viloyati yoqilg‘i-energetika savdosi majmuasida faoliyat yuritgan.
Ilgari Spot GM Uzbekistan “Humo Avtosavdo” bilan dilerlik kelishuvini bekor qilib, ToshkentAvtosavdo" rahbarini lavozimidan ozod etganligi haqida xabar bergan edi.
