Moliya vazirligi yangi tahrirdagi Soliq kodeksi Maxsus qismining dastlabki variantini e’lon qildi. Umumiy qism ustidagi ish yakuniga yetkazilmoqda, u 2018 yil 1 dekabrgacha taqdim etiladi. Bu haqda Norma xabar berdi.
Loyihada O‘zbekiston Respublikasining soliq siyosatini takomillashtirish konsepsiyasi asosiy qoidalari hisobga olingan:
- barcha tadbirkorlik sub’ektlari uchun yuridik shaxslarning mol-mulk solig‘i, yer solig‘i va suv resurslaridan foydalanganlik uchun soliqni joriy etish;
- yillik aylanmasi (yalpi tushumi) 1 mlrd so‘mgacha bo‘lgan soliq to‘lovchilar uchun soliqni 4% miqdordagi bazaviy stavkadan kelib chiqib hisoblash va to‘lash tartibini hamda ixtiyoriy ravishda qo‘shilgan qiymat solig‘ini to‘lash imkoniyatini belgilash;
- jismoniy shaxslardan olinadigan daromad solig‘ining yagona stavkasini joriy etish va fuqarolarning byudjetdan tashqari Pensiya jamg‘armasiga ushlab qolinadigan sug‘urta badallarini bekor qilish;
- davlat maqsadli jamg‘armalariga yuridik shaxslarning aylanmasidan (yalpi tushumidan) undiriladigan majburiy ajratmalarni bekor qilish va b.
Bo‘limlar, boblar, qismlar, moddalar, bandlar va h.k. raqamlari hozircha saqlanib qoldi, barcha muhokama va tavsiyalardan so‘ng ularga tuzatish kiritiladi. E’lon qilingan loyihaga oid taklif va fikr-mulohazalar umumlashtirish va keyinchalik muhokama qilish uchun taxcode@mf.uz elektron manzilida qabul qilinadi.
Soliq kodeksining Umumiy qismi va qo‘shilgan qiymat solig‘i bo‘limi ustidagi ish yakuniga yetkazilmoqda. Ular bilan 2018 yil 1 dekabrgacha tanishib chiqish mumkin bo‘ladi. O‘zaro aloqador shaxslarga soliq solish masalasini ishlab chiqish zarurligi sababli ish uzoq ko‘rilmoqda. O‘zbekiston iqtisodiyotini liberallashtirish va tashqi iqtisodiy faoliyat jadallashishi sharoitida bunday bitimlar soni ortib borayotganligi bois bu alohida e’tiborni talab qiladi.
Umumiy qismda transfert narx belgilash masalalarini aks ettirish rejalashtirilmoqda, shu jumladan:
- nazorat qiluvchi xorijiy kompaniyalar va o‘zaro aloqador shaxslarni belgilash;
- “nozik kapitallashtirish” qoidalari;
- qimmatli qog‘ozlar bilan bog‘liq operatsiyalarga soliq solish xususiyatlari.
Shuningdek transfert narx belgilash bo‘yicha alohida qonun loyihasi ishlab chiqildi. Soliq kodeksining yangi Umumiy qismi asosida Maxsus qismning ayrim boblariga, ayniqsa transfert narx belgilash va nazorat qiluvchi xorijiy kompaniyalar qismida qo‘shimcha ishlov beriladi.
