Vazirlar Mahkamasining qaroriga muvofiq, Toshkent shahrida onlayn nazorat-kassa mashinalari (NKM) tajriba loyihasi ishga tushiriladi.

Mazkur loyiha doirasida mahsulotlarni sotilgan vaqti va joyini ko‘rsatgan holda ma’lumotlarni soliq organlariga onlayn uzatishni ta’minlovchi nazorat-kassa mashinalari orqali tushumlarni nazorat qilishning avtomatlashtirilgan tizimini qo‘llash rejalashtirilmoqda.

Mazkur tajribada savdo va xizmat ko‘rsatish bilan shug‘ullanuvchi tadbirkorlar fiskal modulni (ulangan qurilmaning hisoblash quvvatini ishlatmagan holda fiskal ma’lumotlarni kriptografik himoyasini ta’minlovchi qurilma) ro‘yxatdan o‘tkazganidan so‘ng ixtiyoriy ishtirok etishi mumkin.

Fiskal modul zarur dasturiy ta’minot va texnik resurslar bilan beg‘araz beriladi hamda tadbirkorlarning shaxsiy ma’lumotlari himoyalanadi. Fiskal modulni ro‘yxatdan o‘tkazish uchun tadbirkorlar davlat soliq organlariga shaxsiy kabinetlari orqali murojaat etadi.

Soliq organlari bir ish kunida fiskal modulni ro‘yxatdan o‘tganligi haqida xabarnomani yuboradi. Tadbirkor besh ish kunida fiskal modulni bepul olib ketadi.

Davlat soliq qo’mitasiga onlayn nazorat-kassa mashinalari tizimini tadbiq etish va ishlatish to’g’risida tadbirkorlar o’rtasida, shuningdek, ommaviy axborot vositalarida keng tushuntirish va konsultatsiya ishlari amalga oshirilishini ta’minlash, shuningdek, 2019 yil 1 iyulga qadar onlayn nazorat-kassa mashinalarini qo’llash tartibiga bosqichma-bosqich o’tish bo’yicha aniq takliflarni Vazirlar Mahkamasiga kiritish vazifasi yuklatildi.