Innovatsion rivojlanish vaziri o‘rinbosari Azimjon Nazarov Vengriya poytaxti Budapeshtda bo‘lgan vengr-o‘zbek iqtisodiy hamkorlik bo‘yicha hukumatlararo komissiya yig‘ilishida hamda biznes-forumda ishtirok etdi. Bu haqda vazirlik matbuot xizmati xabar berdi.

Biznes-forumda Vengriyaning yetakchi tadbirkor va ishbilarmon doiralari bilan uchrashuvlar o‘tkazildi. Xususan, “SLA AKKU” ilmiy -tadqiqot kompaniyasi vakillari bilan qayta tiklanadigan energiya manbalari uchun batareyalar ishlab chiqarish sohasida hamkorlik bo‘yicha muzokaralar o‘tkazildi.

Shuningdek, “MULTIMEX” kompaniyasi bilan mijozlarga xizmat ko‘rsatish markazlarida navbatni elektron boshqaruv tizimini O‘zbekistonga joriy etish, “Central Europe Trust” kompaniyasi bilan Vengriyaning venchur kompaniyalarining tajribasini o‘rganish, “CERP” innovatsion klasteri bilan plastik chiqindilarni qayta ishlash korxonasini tashkil etish masalalari muhokama qilindi.

Quyidagilarni amalga oshirish bo’yicha memorandumlar imzolandi:

  • HUN-BAS INVEST Kft kompaniyasi bilan uy hayvonlariga ozuqa yem ishlab chiqarish;
  • qishloq xo‘jaligi uskunalari ishlab chiqaruvchi “HEVESGEP” kompaniyasi bilan innovatsion texnologiyalar yordamida urug‘larni samarali va sifatli saqlash tizimini O‘zbekistonda shakllantirish.