Prezident rahbarligida Andijon viloyati hokimligida faollar yig‘ilishi bo‘lib o‘tdi, xabar beradi davlat rahbari matbuot xizmati.
Yig’ilishda Andijon viloyati sanoatining 80%i Asaka tumani va Andijon shahriga to‘g‘ri kelib, boshqa tumanlarda sanoat deyarli rivojlanmagani ko‘rsatib o‘tildi. Iqtisodiy faol aholining ko‘pchiligi ishsiz, kishi boshiga to‘g‘ri keladigan xizmat ko‘rsatish hajmi yetarli emasligi qayd etildi.
Shu bois Andijon viloyatida 2019−2020 yillarda amalga oshiriladigan qiymati 25 trillion 181 milliard so‘m bo‘lgan 908 ta loyihadan iborat investitsiya dasturi ishlab chiqildi. Ushbu loyihalar jami 1,7 milliard $ to‘g‘ridan-to‘g‘ri xorijiy sarmoyani o‘zlashtirish va 35 mingdan ziyod ish o‘rni yaratishni ta’minlaydi.
Bundan tashqari, tadbirkorlik faoliyatini boshlash istagi bo‘lgan oilalarni aniqlab, “Har bir oila — tadbirkor” dasturi doirasida 420 milliard so‘m imtiyozli kreditlar ajratilishi belgilandi.
Yig‘ilishda ijtimoiy sohalarni rivojlantirish masalalariga ham alohida e’tibor qaratildi. Joriy yilda Andijon shahrida 14 ta ko‘p qavatli arzon uy va ko‘plab tijorat uylari, qishloq joylarda 224 ta namunali uy-joy va 56 ta ko‘p qavatli arzon turar joylar qurilishi ma’lum qilindi.
Shavkat Mirziyoyev viloyat aholisi o‘sib borayotgani yana ko‘plab uylar va qo‘shimcha ish o‘rinlari, ijtimoiy va kommunal xizmatlar tashkil etishni talab qilishi, buning uchun vazirliklar va viloyat rahbarlari uzoqni ko‘zlab, o‘zini qiynab ishlashi zarurligini ta’kidladi.
