Prezident “Avtomobil transportida yuklarni xalqaro tashishni yanada rivojlantirishga doir qo‘shimcha chora-tadbirlar to‘g‘risida"gi hujjatni imzoladi.

Qarorga muvofiq, Tadbirkorlik faoliyatini rivojlantirishni qo‘llab-quvvatlash davlat jamg‘armasi hisobidan avtomobilda yuklarni xalqaro tashiydigan tadbirkorlar katta yuk avtotransport vositalari, tirkamalar va yarim tirkamalarni sotib olishda qo‘llab-quvvatlanadi.

Unga muvofiq kreditlar bo‘yicha foiz xarajatlari qoplanadi:

  • milliy valyutadagi kreditlar bo‘yicha — banklar stavkasining 25%i, biroq 5%li punktdan ko‘p bo‘lmagan miqdorda;
  • xorijiy valyutadagi kreditlar bo‘yicha — banklar stavkasining 40%i, biroq 3%li punktdan ko‘p bo‘lmagan miqdorda;
  • kredit summasining 50%igacha, biroq 2 mlrd so’mdan ko‘p bo‘lmagan miqdorda kafillik beriladi.

Ishlab chiqarilganiga 4 yildan ko‘p bo‘lmagan katta yuk avtotransport vositalari, ishlab chiqarilganiga 6 yildan ko‘p bo‘lmagan tirkamalar va yarim tirkamalar banklar tomonidan ularni kreditga sotib olishda tomonlarning roziligi bilan garov sifatida qabul qilinishi mumkin.

Bitta transport hisobiga yuk tashish bo‘yicha xizmatlar eksportidan bir yilda 20 ming $dan ortiq tushum olgan milliy tashuvchilarga avtomobilda tashishga aniq bir davlatning 2 ta ruxsatnomasi beriladi.

Shuningdek, qaror bilan “O‘zavtosanoat” AJning JV MAN — Auto Uzbekistan va UzAuto Trailer tomonidan ishlab chiqarilgan yangi mahsulotlar mahsulot qiymatiga inflyatsiya darajasi doirasida tuzatish kiritish imkoniyati bilan ikki yilgacha muddat bilan to‘lovni foizsiz bo‘lib-bo‘lib to‘lash shartlarida sotish belgilandi.