Tezkor ma’lumot asosida o‘tkazilgan tadbir chog‘ida Farg‘ona tumani Yoshlarobod qishlog‘i hududida “Nexia” rusumli avtomashinani boshqarib ketayotgan N.T to‘xtatilib tekshirilganda uning qilmishi fosh bo‘ldi, xabar beradi “Uza”.
Aniqlanishicha, 1996 yilda ishlab chiqarilgan mazkur avtomashina kuzov va dvigatel raqamlariga ko‘ra qo‘shni davlatga tegishli ekan.
N.T ning ko‘rsatmasi asosida uning Farg‘ona shahridagi yashash xonadoni xolislar ishtirokida ko‘zdan kechirilib, hovlisida 1 dona “Nexia” rusumli avtomashina turgani, u ham qo‘shni davlatga tegishli transport vositasi ekani ma’lum bo‘ldi.
Aniqlanishicha, N.T va A.Q.lar qo‘shni davlatga borib, u yerdagi tanishidan 2 dona “Nexia” rusumli avtomashinani sotib olgan. 600 dollar evaziga aylanma yo‘llar orqali, bojxona nazoratini chetlab, Farg‘ona tumani hududiga olib o‘tgan.
Ular boshqa avtomashinaning davlat raqamlarini noqonuniy olib o‘tilgan mashinaga taqib qo‘yishgan. 2 dona “Nexia” rusumli avtomashinani ehtiyot qismlarga ajratgan holda O‘zbekiston hududida sotib foyda ko‘rmoqchi bo‘lgan.
Olib borilgan surishtiruv ishlari davomida mazkur avtomashinalar O‘zbekiston Respublikasi hududida ro‘yxatga olinmaganligi, ularning qiymati 44 million 500 ming so‘mni tashkil qilishi aniqlangan.
Viloyat bojxonasi boshqarmasi tomonidan ularga nisbatan ish hujjatlari to‘planib, Farg‘ona shahar ma’muriy sudiga yuborilgan. Sud tomonidan huquqbuzarlarga nisbatan tegishli jazo tayinlanib, 2 dona “Nexia” rusumli avtomashina davlat foydasiga musodara qilindi.
Qonunbuzarlikni oldi olinishiga erishildi. Mazkur avtomashinalar qancha odamlarning xavfsizligiga ta’sir qilishi, jinoyatlarni kelib chiqarishi ham mumkin edi. Mamlakatimizda huquqni muhofaza qiluvchi idoralar tomonidan ana shunday noqonuniy holatga albatta chek qo‘yiladi.
