1 iyuldan boshlab, eski namunadagi (2001−2002, 2004 va 2009 yillar namunasidagi) 50 so‘mlik, 100 so‘mlik tangalari hamda (1994 yil namunasidagi) 50 so‘mlik va 100 so‘mlik banknotlari to‘lov qobiliyatini yo‘qotdi va muomaladan chiqarildi.
Joriy yil 1 iyul kuniga qadar eski namunadagi 50 so‘mlik va 100 so‘mlik banknotlar va tangalar Markaziy bank hududiy Bosh boshqarmalarining Hisob-kitob kassa markazlari, barcha tijorat banklari va ularning filiallari tomonidan qabul qilinib, almashtirib berildi.
Eski namunadagi 50 va 100 so‘mlik tangalar va banknotlarni bevosita Markaziy bankning hududiy Bosh boshqarmalari Hisob-kitob kassa markazlarida yangi namunadagi tangalarga va muomalada bo‘lgan boshqa nominaldagi banknotlarga almashtirib olish mumkin, deyiladi Markaziy bank xabarida.
Eski namunadagi 200 so‘mlik va 500 so‘mlik banknotlar 2020 yil 1 iyulga qadar muomalada bo‘ladi hamda ushbu muddatga qadar qonuniy to‘lov vositasi hisoblanadi.
“O‘zbekiston Respublikasi Markaziy bankining eski namunadagi 50 va 100 so‘mlik tangalarini, shuningdek 50, 100, 200 va 500 so‘mlik banknotlarini ayirboshlash hamda muomaladan qaytarib olish tartibi to‘g‘risida"gi Nizomga asosan 1 iyuldan boshlab bank kassalariga topshirilgan 1997 yil namunasidagi 200 so‘mlik va 1999 yil namunasidagi 500 so‘mlik banknotlar tijorat banklari filiallari tomonidan almashtirib beriladi.
