“Oʻzbekneftgaz” IPO qilishni rejalashtirmoqda

Birlamchi ommaviy aksiyalarni joylashtirishni tashkil etish tashkiloti (IPO)ning Bosh vazir oʻrinbosari Jamshid Qoʻchqorov tomonidan tasdiqlangan “Yoʻl xaritasi” ning ijrosini ta’minlash maqsadida, “Oʻzbekneftgaz” АJ Boshqaruvi raisi Mehriddin Аbdullayev boshchiligida Respublika fond birjasining birja kotirovkalari roʻyxatiga Jamiyat aksiyalarini kiritish boʻyicha ish olib borilmoqda.

Bugungi kunda “Oʻzbekneftgaz” AJning erkin muomaladagi imtiyozli aksiyalarining miqdori 24 312 673 donani tashkil etadi. Hozirgi vaqtda ushbu aksiyalarni sotib olish va sotish ishlari birjadan tashqari savdolar tashkilotchisi — “ELSIS — SAVDO” АJ savdo maydonchasida amalga oshirilmoqda.

Joriy yiling yarim yili uchun “Oʻzbekneftgaz” АJning imtiyozli aksiyalarining narxi har bir aksiya uchun 720 soʻmdan 3000 soʻmgacha, nominal qiymati 500 soʻm boʻlgan. Bu esa, bozorda ushbu turdagi aksiyalarning jozibadorligini koʻrsatmoqda.

Аksiyalarni fond birjalarining kotirovkalar roʻyxatiga kiritilishi esa investorlar doirasini kengayishiga, ularning aksiyalarga boʻlgan ishonchini mustahkamlashga, shuningdek aksiyalarning likvidligini oshirish imkoniyatini beradi.

Shu munosabat bilan, “Oʻzbekneftgaz” АJ aksiyalarini Respublika fond birjasining birja kotirovkalari roʻyxatiga kiritish masalasi vakolatli boshqaruv organlari tomonidan koʻrib chiqilishi uchun taqdim etildi.