Markaziy bank tomonidan eʼlon qilingan infografikaga koʻra, yanvar oyida chet el valyutasiga talab oshdi.
Valyuta sotib olish va sotish
2022-yilning birinchi oyida aholi banklardan $613,6 mln xarid qildi, bu oʻtgan yilning yanvar oyiga nisbatan $231 mln ga yoki 61% ga koʻpdir. Savdolar ham oshdi, lekin sezilarli darajada emas (11%). Oʻtgan oyda banklar fuqarolardan $464,2 mln, yaʼni 2021-yilning shu davriga nisbatan $44 mln ga koʻp xarid qildi.
Shu bilan birga, avvalroq Spot yozganidek, yanvar oyida banklarda dollar kursi 10 910 soʻmga yetgan, xarid diapazoni 10 800 soʻmdan 10 890 soʻmgacha boʻlgan edi. Oʻz navbatida, Oʻzbekiston Hisob palatasi 2022-yilda dollar kursini 11300 soʻmdan yuqori boʻlishini prognoz qilgan edi.
Transchegaraviy oʻtkazmalar
Xorijdan pul oʻtkazmalari statistikasi ham oʻsganini koʻrsatmoqda. Mamlakatda qabul qilingan transchegaraviy oʻtkazmalar hajmi $506,1 mln ni tashkil etdi, bu oʻtgan yilning yanvar oyiga nisbatan $79 mln ga (18%) koʻpdir. Oy davomida mamlakatimizdan $127,6 mln miqdorida xorijiy valyutalar joʻnatildi, bu oʻtgan yilning yanvar oyiga nisbatan $27 mln ga yoki 26% ga koʻpdir.
Mehnat migrantlarining xorijiy valyutadagi pul oʻtkazmalari Oʻzbekiston iqtisodiyoti uchun muhim omil boʻlib, aholining toʻlov qobiliyati va tovar bozoridagi talabga taʼsir koʻrsatmoqda. Markaziy bank avvalroq pul oʻtkazmalarini aholining ham birlamchi, ham ikkilamchi daromadlarining asosi deb atagan. Oʻzbekiston Rossiyadagi mehnat muhojirlari soni boʻyicha anʼanaviy yetakchi hisoblanadi.
