Shavkat Mirziyoyev 15-iyun kuni tabiiy gaz bozoridagi oʻzgarishlarni tasdiqladi. Tegishli farmon Lex.uz portalida eʼlon qilindi.
Qayd etilishicha, mazkur qaror davlat rahbarining apreldagi qaroriga muvofiq qabul qilingan. Unda gazni ulgurji sotib olish va sotishni alohida operatorga oʻtkazish nazarda tutilgan.
Prezident gazni markazlashgan holda sotib olish-sotish boʻyicha alohida kompaniya — “OʻzGazTrade"ni tashkil etish taklifini maʼqulladi. Hozir bu bilan shugʻullanayotgan “Oʻztransgaz"ga gazni tashish, tranzit qilish va saqlash qoladi.
Yangi korxonaning ustav kapitali davlat byudjetidan ajratiladigan subsidiyalarning bir qismi hisobidan shakllantiriladi. 1-avgustdan boshlab “OʻzGazTrade” aksiyadorlik jamiyati quyidagi funksiyalarni bajaradi:
- mahalliy ishlab chiqaruvchilardan (idoralararo komissiya tomonidan tasdiqlangan tariflar boʻyicha) va xorijiy yetkazib beruvchilardan gaz sotib olish;
- “Hududgaztaʼminot” tuzilmalari va magistral gaz quvurlariga ulangan isteʼmolchilar bilan toʻgʻridan-toʻgʻri tuzilgan shartnomalar boʻyicha zangori yoqilgʻi sotish;
- tabiiy gazning yagona eksportchisiga aylanish.
Shunga koʻra, xuddi shu kundan boshlab tabiiy gazni oldi-sotdisi, shu jumladan mahsulot taqsimoti boʻyicha tuzilgan shartnomalar boʻyicha huquq va majburiyatlar unga oʻtadi.
Iqtisodiy rivojlanish vazirligi har yili resurslar va isteʼmol balansidan kelib chiqqan holda kelgusi yil uchun gaz eksporti hajmi boʻyicha takliflar kiritadi. Oʻz navbatida, UzGazTrade gazni tender, tanlov va hukumat qarori asosida import qiladi.
1-avgust holatiga koʻra gazni sotib olish va uni Oʻzbekiston hududida sotish bilan bogʻliq qarzlar boʻyicha barcha huquq va majburiyatlar “Oʻztransgaz"da qoladi. Prezident kompaniyani bir oy muddatda oʻzgartirish rejasini tayyorlash boʻyicha topshiriq berdi.
Reja kompaniyani yaxshilash va qarzlarni toʻlash boʻyicha chora-tadbirlarni oʻz ichiga olishi kerak. Shuningdek, u tashkiliy tuzilmani qayta koʻrib chiqish, xalqaro moliyaviy hisobot va boshqaruv standartlarini joriy etishni oʻz ichiga oladi. 2024-yil oxirigacha “Oʻztransgaz” kredit reytingini olishi kerak.
“Oʻztransgaz” 2020 va 2021-yillarda respublikaning eng zarar koʻrgan davlat kompaniyalari roʻyxatida birinchi oʻrinni egalladi.
