Yevropalik dasturchi videoxosting foydalanuvchilarining izohlarini to‘playdigan va ularni Mistral modifikatsiyalangan til modeli yordamida tahlil qiladigan YouTube-Tools xizmatini ishga tushirdi.
Tizim bir necha soniya ichida shaxsning taxminiy yashash joyi, muloqot tillari va siyosiy afzalliklarini o‘z ichiga olgan batafsil profilini yaratadi, deya xabar bermoqda 404 Media nashri.
Platforma oddiy tamoyil asosida ishlaydi: foydalanuvchi sharhlovchining taxallusini kiritadi, shundan so‘ng algoritm uning YouTube’dagi barcha xabarlarini topadi va ularni tahlil qilish uchun sun’iy intellektga uzatadi.
Sun’iy intellekt izoh egasining shaxsiy xususiyatlarini aniqlash uchun uning yozish uslubi, ma’lum bir joylarni eslatish, madaniy havolalar va boshqa belgilarni o‘rganadi.
Sinov rejimida xizmat tasodifiy italiyalik foydalanuvchini tahlil qildi va mahalliy teleko‘rsatuv va oshxona haqidagi sharhlarga asoslanib, uning Italiya bilan aloqasini aniqladi. Sun’iy intellekt, shuningdek, ijtimoiy me’yorlarga tanqidiy munosabatni va madaniy munozaralarga qiziqishni aniqladi.
Qayd etilishicha, YouTube-Tools ma’lumotlar bazasi 1,4 mlrd foydalanuvchi to‘g‘risidagi ma’lumotlarni va 20 mlrd izohni o‘z ichiga oladi.
Ta’kidlanishicha, bu vosita huquqni muhofaza qilish organlari, xususiy detektivlar va jurnalistlar uchun mo‘ljallangan. U Portugaliya, Belgiya va boshqa Yevropa mamlakatlarining politsiyasi bilan hamkorlik qilmoqda.
Ammo amalda har qanday kishi shunchaki elektron pochta manzili va bank kartasi ma’lumotlarini kiritib, oyiga $20ga ro‘yxatdan o‘tishi va tizimga kirish imkoniyatiga ega bo‘lishi mumkin.
Foydalanish shartlari rasmiy ravishda faqat litsenziyalangan tergovchilar va huquqni muhofaza qiluvchi organlar kirishini cheklaydi, biroq amalda hech qanday tekshiruv o‘tkazilmaydi.
404 Media jurnalistlari hech qanday qo‘shimcha savolsiz osongina hisob yaratib, xizmatdan foydalanishni boshladilar.
YouTube-Tools video xosting xizmatining maxfiylik siyosatini buzmoqda. Bu siyosat faqat kompaniyaning yozma ruxsati bilan yoki robots.txt fayliga muvofiq ma’lumotlarni yig‘ishga ruxsat beradi.
Bunday xizmatlar internet foydalanuvchilarini ta’qib qilish va ularga nisbatan nojo‘ya xatti-harakatlar uchun jiddiy xavf tug‘diradi.
Avvalroq Spot YouTube barcha videolarni istalgan tilda to‘liq dublyaj qilish imkoniyatiga ega bo‘lishi haqida yozgandi.
Shuningdek, kompaniya sun’iy intellekt yordamida lablar harakatlarini tarjimaga moslashni va vafot etgan aktyorlarni “jonlantirishni” ham rejalashtirmoqda.
