Wikipediani boshqaruvchi Wikimedia jamg‘armasi ko‘ngilli muharrirlar hamjamiyatining keskin tanqididan so‘ng maqolalarda avtomatik sun’iy intellekt xulosalari tajribasini to‘xtatdi.
2-iyundan boshlangan test rejimi murakkab materiallarni idrok etishni osonlashtirishi kerak edi, ammo yillar davomida ensiklopediya sifatini qo‘lda ushlab turganlar orasida norozilik to‘lqinini keltirib chiqardi.
Tajriba Wikipedianing mobil versiyasida qisqa mashinada yaratilgan annotatsiyalarni ko‘rsatishni nazarda tutgan. Qisqa mazmunlar Cohere kompaniyasining Aya modeli tomonidan ishlab chiqarilgan va “tekshirilmagan” degan sariq ogohlantirish bilan belgilangan.
Biroq, muharrirlar bu g‘oyani “juda yomon”, “obro‘ga tahdid soluvchi” deb baholashdi va hatto “Google foydalanuvchilarni sun’iy intellekt yelimlari bilan boqayotgani, biz ham shunday qilishimiz kerak, degani emas” kabi kinoyali izohlar bilan javob qaytarishdi.
Mualliflarning e’tirozlari uchta asosiy sababga asoslanadi:
- nazoratni yo‘qotish — algoritmik xulosalar an’anaviy tekshiruv tizimini chetlab o‘tadi;
- xatolar xavfi — hatto “tekshirilmagan” deb belgilangan bo‘lsa ham, ular haqiqat sifatida qabul qilinishi mumkin;
- ishonchga putur yetkazish — Vikipediya o‘nlab yillar davomida “zerikarli, ammo ishonchli” manba qiyofasini yaratdi.
Bu tajriba bitta algoritmga o‘quvchilarning dastlabki taassurotlari ustidan hukmronlik qilish imkoniyatini berardi, holbuki bizning butun modelimiz jamoaviy tahrirlashga asoslangan, — deb ta’kidladi muhokama ishtirokchilaridan biri.
Tashabbus Wikimania 2024 anjumanidan keyin vujudga keldi. Unda murakkab maqolalarni turli bilim darajasidagi o‘quvchilarga moslashtirish yo‘llari muhokama etilgan edi.
Jamg‘arma vakillari ta’kidlashicha, qisqacha mazmunlar yangi foydalanuvchilarga, ayniqsa o‘qish ko‘nikmasi cheklangan kishilarga yordam berish maqsadida ochiq model asosida tayyorlangan. Sun’iy intellektning har qanday qo‘llanilishi esa muharrirlarning albatta nazoratidan o‘tishi kerak edi.
Avvalroq Spot Ilon Mask Wikipedia nomini o‘zgartirish uchun milliard dollar taklif qilgani haqida yozgandi. Milliarder agar onlayn ensiklopediya nomini o‘zgartirsa xayriya qilish taklifini aytib o‘tgan.
