Soliq qo‘mitasi raisi Sherzod Kudbiyev O‘zbekistonda soliq solish tizimini unifikatsiya qilish tarafdori ekanini bildirdi. Bu haqda u 5-iyul kuni Savdo-sanoat palatasi tomonidan mehmonxona sohasi va auditorlik tashkilotlari vakillari bilan o‘tkazilgan ochiq muloqotda qayd etdi.
Uning so‘zlariga ko‘ra, xizmat ko‘rsatish sohasida qo‘shilgan qiymat solig‘i (QQS) summasi past hisobga olinishi kuzatilmoqda, chunki tannarxning asosiy qismi xodimlarning ish haqiga to‘g‘ri keladi. Amaldor bu biznesning soyaga ketishi yoki parchalanishiga olib kelishini ta’kidlab, tibbiy xizmatlarni misol qilib keltirdi. “Agar biz soliq yukini kamaytirsak, hajmlar ochiqligi hisobiga budjet pul yo‘qotmaydi”, — dedi u.
Soliq qo‘mitasi rahbarining tushuntirishicha, 1 mlrd so‘mlik QQS to‘lashga o‘tish chegarasi keyinchalik uni oshirish uchun kiritilmagan. Maqsad — buxgalterlarga QQS bilan ishlashga tayyorgarlik ko‘rish uchun moslashish davrini berish.
“Hamma QQS to‘lovchisi bo‘lishi kerak. Bizda soliqqa tortishning beshta turi bor. Bitta soliqchi QQSni ham, foyda solig‘ini ham, aylanmadan olinadigan soliqni ham, qat’iy belgilangan soliqni ham, o‘zini o‘zi band qilganlar uchun tizimni ham tushunishi kerak. Bu esa ma’muriyatchilikni murakkablashtiradi, ko‘plab xatolarga olib keladi va, afsuski, korrupsiyaga zamin yaratadi”, — dedi Sherzod Kudbiyev.
U bu masala bo‘yicha kompleks yechim yaratishga va’da berib, Xalqaro valyuta jamg‘armasi ham soliqqa tortish tizimini unifikatsiya qilishni tavsiya qilganini qo‘shimcha qildi. “Bu darrov amalga oshmaydi, chunki moliya yili tugashi kerak”, — deya xulosa qildi u.
2024-yil 20-dekabrda Meros Pharm farmatsevtika kompaniyasi direktori Suhrob Po‘latov dorixonalar uchun yagona soliq tizimini joriy etishni taklif qildi. Uning so‘zlariga ko‘ra, QQS to‘lashga o‘tish chegarasidan voz kechish narxlarni shakllantirishda yagona yondashuvni ta’minlaydi.
Shavkat Mirziyoyev bu taklifni qo‘llab-quvvatladi. “Raqobatga hamma tayyor bo‘lishi kerak. Agar ikkita stavka qo‘yilsa, hech qachon raqobat bo‘lmaydi”, — dedi davlat rahbari.
Soliq qo‘mitasiga Iqtisodiyot va moliya vazirligi va Savdo-sanoat palatasi bilan birgalikda dorixonalar ishtirokida masalani o‘rganish topshirildi. Soliqlarni tartibga solish soha rivojini ta’minlaydi, dedi prezident.
2025-yil 1-apreldan boshlab O‘zbekistonda farmatsevtika mahsulotlarini sotish yoki tibbiy xizmatlar ko‘rsatish bilan shug‘ullanuvchi barcha yuridik shaxslar daromadlaridan qat’i nazar QQS to‘lashni boshladilar.
Avvalroq Spot Soliq qo‘mitasi Soliq kodeksining 227−1-moddasi bo‘yicha Lactalis’ning 5,4 mlrd so‘mlik jarimasini bekor qilgani haqida yozgandi.
