YouTube reklama maqsadli ko‘rsatish tizimiga o‘zgartishlar kiritdi. Bu haqda Kod Durova xabar berdi.
Bu o‘zgarishlar Rossiya foydalanuvchilariga va rus tilida kontent yaratuvchilarga ta’sir ko‘rsatadi.
Rossiyadan bo‘lgan YouTube kanallari mualliflari tegishli bildirishnomani olishdi. Unda ta’kidlanishicha, asosiy omil sifatida foydalanuvchining interfeys tili sozlamalari va joylashuv mintaqasi belgilanadi.
“YouTube reklama kampaniyalarining maqsadli auditoriyaga yetib borishini ta’minlashni maqsad qilgani sababli yaqinda reklama beruvchilar tanlagan muayyan hududlarda reklamalarning maqsadli auditoriyaga chiqishini yaxshiroq kafolatlash uchun reklama targeting tizimimizni yangiladik. Ushbu tuzatish ba’zida ba’zi kanallar uchun daromadning o‘zgarishiga olib kelishi mumkin”. — deyiladi YouTube maktubida.
Endi, hatto foydalanuvchi o‘z mamlakatidan tashqarida bo‘lsa yoki VPN xizmatlaridan foydalansa ham, u mahalliy bozorlarga mo‘ljallangan reklamalarni ko‘rmaydi.
Xorijiy reklama beruvchilarning shikoyatlari o‘zgarishlarga sabab bo‘lgani ma’lum qilindi. Ular o‘z e’lonlari rus tilidagi videolarda maqsadli bo‘lmagan auditoriyaga ko‘rsatilayotganini aniqlashgan.
Google kompaniyasi reklama beruvchilar o‘z reklamalari qaysi auditoriyaga ko‘rsatilishini aniqroq nazorat qilishlari uchun algoritmlarga tuzatishlar kiritilganini tasdiqladi.
Rossiyalik tomoshabinlar uchun bu yaxshi yangilik bo‘lishi mumkin, chunki endi ular hatto xorijiy VPN orqali ko‘rganda ham reklamani ko‘rmasligi ehtimoli yuqori. Shu bilan birga, rus tilidagi kontent yaratuvchilari xorijiy reklamadan tushadigan daromadning pasayishiga duch kelishi mumkin.
2022-yildan boshlab YouTube rossiyalik foydalanuvchilar uchun rasman reklama ko‘rsatishni to‘xtatdi. Biroq, 2024-yilda Rossiyada YouTube ishlashining sekinlashishi fonida ko‘plab rossiyalik foydalanuvchilar odatiy tezlikda video tomosha qilish uchun VPN xizmatlaridan foydalana boshladilar.
Avvalroq Spot YouTube sun’iy intellekt orqali yaratilgan videolarni monetizatsiya qilishni kamaytirishi haqida yozgandi.
15-iyul kuni monetizatsiya siyosatiga kiritiladigan o‘zgartirishlar bilan qaysi turdagi kontent daromad keltirishi, qaysi biriga pul to‘lanmasligi haqida batafsil ko‘rsatmalar qo‘shiladi.
