O‘zbekistonda 1-sentabrdan nimalar o‘zgaradi?

Maktab va bolalar bog‘chalari direktorining ish haqi oshiriladi

Xususan, maktab direktori lavozimining bazaviy tarif stavkasi 20% ga, ularning o‘rinbosarlariniki esa 15% ga oshiriladi. I va II guruhga kiruvchi maktabgacha ta’lim tashkiloti direktorlari lavozimlarining bazaviy tarif stavkalari tegishlicha III va IV guruhdagi maktab direktori o‘rinbosari lavozimining bazaviy tarif stavkalariga tenglashtiriladi.

Natijada mamlakatdagi 10 mingdan ortiq maktab direktori, 7 mingga yaqin bog‘cha direktorlari hamda 35 mingga yaqin maktab direktor o‘rinbosarlarining ish haqini oshirilishiga erishiladi.

Endi YTTlar zargarlik buyumlari savdosi bilan shug‘ullanishlari mumkin

Davlat asillik darajasi nazorati inspeksiyasiga xorijda ishlab chiqarilgan zargarlik buyumlarining, basharti ular bo‘yicha bojxona to‘lovlari amalga oshirilganligini tasdiqlovchi hujjatlar bo‘lmasa, asillik darajasini tekshirish va tamg‘alash man etiladi.

Bundan tashqari, yakka tartibdagi tadbirkorlarga zargarlik buyumlarini sotish faoliyati bilan shug‘ullanishga ruxsat etiladi.

Inspeksiya tomonidan Toshkent va Nukus shaharlari hamda viloyatlar markazlarida zargarlik buyumlarining asillik darajasini tekshirish va ularni tamg‘alash bo‘yicha sayyor xizmat ko‘rsatish amaliyoti yo‘lga qo‘yiladi.

Qimmatbaho metallar va qimmatbaho toshlar to‘g‘risidagi qonunchilikka oid huquqbuzarliklar to‘g‘risida “Soliq” mobil ilovasi orqali xabar bergan shaxslarga undirilgan jarimaning 50%i miqdorida mukofot to‘lanadi.

Ayrim oilalar maktablarning uzaytirilgan kun guruhlari uchun to‘lovdan ozod etiladi

Umumiy o‘rta ta’lim muassasasining uzaytirilgan kun guruhlariga qatnaydigan bolalar umumiy sonining 15%i miqdorida kambag‘al oilalar farzandlari uchun alohida kvota ajratiladi va ular ota-onalar to‘lovidan ozod etiladi.

Qurilish obyektlariga QR-kodli pasport joriy qilinadi

Har bir qurilayotgan obyektga QR-kodli pasport joriy etiladi. Bu orqali shaharsozlik subyektlari, qurilish muddati, hujjatlar va ekspertiza xulosalari haqida ma’lumot olinadi.

Qurilish vazirligi uni o‘rnatish tartibini belgilovchi nizom loyihasini muhokamaga qo‘ygandi. QR-kodli pasport binoning kirish qismiga yoki barcha uchun ko‘rinadigan joyga davlat tilida o‘rnatilishi kerak. U obyekt foydalanishga topshirilgungacha amalda bo‘lishi shart.

Qurilish obyekti hududiy inspeksiyasida ro‘yxatdan o‘tkazilgach, “Shaffof qurilish” axborot tizimida obyektga oid dastlabki ma’lumotlar joylashtirilgan sahifa uchun QR-kod avtomatik tarzda shakllantiriladi.

Shuningdek, ko‘p kvartirali uylarning konstruktiv qismlariga, ta’yanch devorlariga noqonuniy o‘zgartirishlar kiritish, buzish hamda bino zilzilaga bardoshliligiga salbiy ta’sir qiluvchi ishlar amalga oshirilishi taqiqlanadi.

Kichik va o‘rta biznes subyektlarining faoliyatini tugatishda soliq tekshiruvlari bekor qilinadi

Endi oxirgi 3 yil davomida daromadi 10 mlrd so‘mdan oshmagan, qarzlari yo‘q hamda soliq hisoboti muntazam topshirilgan kichik va o‘rta biznes subyektlari faoliyatini ixtiyoriy tugatishda soliq tekshiruvi o‘tkazilmaydi.

Ayrim tashkilotlarga elektron mehnat shartnomalarini tuzishga ruxsat beriladi

1-sentabrdan ayrim kompaniyalarga YMMTda (Yagona milliy mehnat tizimi) biometrik identifikatsiya qilish (Face-ID) orqali elektron mehnat shartnomalarini tuzish va bekor qilishni rasmiylashtirishga ruxsat beriladi. Bu xodimlari 50 nafargacha bo‘lgan xizmat ko‘rsatish, qishloq xo‘jaligi va qurilish sohasidagi xo‘jalik yurituvchilarga nisbatan tatbiq etiladi.

Bundan tashqari, 1-sentabrdan davlat mehnat inspektorlari tomonidan o‘tkaziladigan tekshiruvlar haqida vakolatli organni oldindan xabardor qilish tartibi bekor qilinadi.

Shuningdek, “Xavfni tahlil etish” tizimining tahlil natijalariga asosan o‘tkaziladigan tekshiruvlarning boshlanishi haqida kamida 10 ish kuni oldin tadbirkorni xabardor qilish tartibi davlat mehnat inspektorlari tomonidan o‘tkaziladigan tekshiruvlarga tatbiq etilmaydi.

Ish beruvchilar uchun ayrim talablar bekor qilinadi

Endi ish beruvchilar uchun bo‘sh ish o‘rinlariga bandlik organlari tomonidan yuborilgan shaxslarni ishga qabul qilmagani uchun qo‘yiladigan ma’muriy javobgarlik hamda bo‘sh ish o‘rinlari mavjudligi to‘g‘risida majburiy hisobot topshirish talabi bekor qilinadi.

Shuningdek, 1-sentabrdan boshlab vazirliklar, idoralar va iqtisodiyot tarmoqlarining strategik korxonalari tomonidan maqsadli stajirovka uchun nomzodlar ro‘yxati tuziladi, stajirovka tashkil qilinadigan xorijiy tashkilotlar va muddatlari belgilab beriladi hamda mutaxassislar uchun xorijiy tilni o‘rganish sharoitlari yaratiladi.

O‘zbekistonga polietilen granulalari uchun aksiz solig‘i stavkasi bekor qilinadi

O‘zbekistonda ishlab chiqarilmaydigan va aniq texnik talablar asosida belgilanadigan ro‘yxat bo‘yicha mamlakatga olib kiriladigan polietilen granulalariga 2028-yil 1-yanvargacha aksiz solig‘i nol stavkada qo‘llanadi.

Raqamli markirovka va onlayn kassa tekshiruvlari kuchaytiriladi

Xavfni tahlil qilish tizimida majburiy raqamli markirovka qoidalarini buzish yuqori soliq xavfi deb hisoblanadi. Raqamli markirovka kodisiz elektron hisobvaraqqa yo‘l qo‘yilmaydi va chakana savdoda faqat to‘g‘ri kiritilgan markirovka kodi asosida onlayn kassa chek shakllantiriladi hamda ilgari ishlatilgan kodlar bilan chek chiqarishga ruxsat berilmaydi.

Farmatsevtika faoliyati uchun litsenziya olishda yangi talablar belgilanadi

1-sentabrdan farmatsevtika faoliyatini hamda dori vositalari va tibbiy buyumlarni chakana sotish faoliyatini litsenziyalash talablari kuchaytiriladi.

Yangidan tashkil etilgan kompaniyalar faoliyatini amalga oshirish uchun ko‘chmas mulk bo‘yicha ijara yoki tekin foydalanish shartnomasini soliq organlarida hisobga qo‘yishlari kerak. Dori vositalarini sotishda xaridorlardan to‘lovlarni qabul qilishda elektron to‘lov vositalaridan foydalanish imkoniyati yaratilgan bo‘lishi talab etiladi.

Bojxona to‘lovlarini to‘lash tartibi soddalashtiriladi

Tadbirkorlarga bоjxona to‘lovlari va boshqa rasmiylashtirish to‘lovlarini mamlakatning istalgan hududidan amalga oshirish imkoniyati yaratiladi hamda buning uchun yagona g‘azna hisobvarag‘i ochiladi.

Soddalashtirilgan tartibda ko‘riladigan da’volar summasi oshiriladi

Da’vo arizalarini soddalashtirilgan tartibda ko‘rib chiqishda da’vo summasi yuridik shaxslarda BHMning 150 baravarigacha, yakka tartibdagi tadbirkorlarda 100 baravarigacha, jismoniy shaxslarda esa 50 baravarigacha oshiriladi.

Oliy ta’lim muassasalarida yangi o‘quv yili boshlanadi

Unga ko‘ra, akademik litseylarning barcha bosqich o‘quvchilari va oliy ta’lim tashkilotlarining 1-bosqich talabalari uchun dars jarayonlari 2025-yil 3-sentabrdan boshlanadi. OTMlarning 2- va undan yuqori bosqich talabalari uchun esa darslar 8-sentabrdan boshlanadi.

Oliy ta’lim tashkilotlarida birinchi bosqichga qabul qilingan talabalar uchun “Kredit ta’limi tizimiga kirish” haftaligi hamda “Talabalikka bag‘ishlov” tadbirlari tashkil etiladi.

Poytaxt va Toshkent viloyati jamoat transporti uchun yang tizim joriy etiladi

Iyul oyida Shavkat Mirziyoyev raisligida o‘tkazilgan yo‘l harakati xavfsizligini ta’minlash va tirbandlikni kamaytirish bo‘yicha videoselektor yig‘ilishida Toshkent shahriga kuniga 1 mln odam tashrif buyurishi, shundan 275 ming nafari Toshkent viloyatidan kelishi qayd etilgandi.

Shu bois poytaxt jamoat transporti yagona aglomeratsiya tizimiga o‘tib, Toshkent viloyatining barcha tutash hududlarini qamrab oladi. Buning uchun, Toshkent xalqa yo‘ligacha kelayotgan 20 ta avtobus yo‘nalishi 15−20 kilometrga uzaytiriladi, yana yangi 6 ta marshrut qo‘shiladi. Bu Toshkent viloyati aholisi uchun katta qulaylik bo‘lishi ta’kidlandi.

“Marshrutlar uzaysa, kutish vaqti ko‘payadi”, deb aholi xavotirga tushmasin. Sentabrgacha poytaxtga 200 ta, keyingi yili yana 1 mingta avtobus olib kelamiz", — dedi davlat rahbari.

Yangi tizim joriy yilning 1-sentabridan poytaxt va Toshkent viloyati uchun, 2026-yildan esa yirik shaharlarda joriy qilish topshirildi.

“Radar” yo‘l belgisini o‘rnatish majburiy bo‘ladi

1-sentabrdan boshlab O‘zbekiston bo‘ylab harakat tezligini nazorat qilishga mo‘ljallangan barcha statsionar va mobil radarlar joylashgan hududlarda “Radar” yo‘l belgilarini o‘rnatish majburiy bo‘ladi.

Xorijdan deportatsiya qilingan fuqarolarga oid ma’lumotlarning elektron reyestri yuritiladi

2025-yilning 1-sentabridan boshlab Migratsiya agentligi tomonidan Migratsiya jarayonlariga doir ma’lumotlarning yagona elektron bazasi yuritiladi.

Unda xorijda qonunchilik hujjatlarini buzishi natijasida deportatsiya qilingan hamda O‘zbekistonning xalqaro nufuziga salbiy ta’sir qiluvchi xatti-harakatlarni sodir etgan fuqarolarning ma’lumotlari bo‘ladi.

Yagona ma’lumotlar bazasiga elektron reyestr sifatida quyidagilar kiritiladi:

• O‘zbekiston Tashqi ishlar vazirligi tomonidan xorijdagi diplomatik vakolatxonalar va konsullik muassasalaridan olingan ma’lumotlar;
• O‘zbekiston Ichki ishlar vazirligi tomonidan xalqaro shartnomalarga muvofiq readmissiya qilingan shaxslar haqidagi ma’lumotlar;
• Migratsiya agentligi va uning xorijdagi vakolatxonalaridan (vakillaridan) olingan ma’lumotlar.

Toshkent viloyatida issiq suv va issiqlik ta’minoti tariflari oshadi

Xalq deputatlari Toshkent viloyati kengashi hududda issiq suv va issiqlik ta’minoti xizmatlari uchun yangi tariflarni tasdiqladi. Aholi uchun tariflar joylashuviga qarab o‘rtacha 10% ga, ulgurji iste’molchilar uchun 8% dan 95,3% gacha oshiriladi.

Qayd etilishicha, yangi tariflar 10-sentabrdan boshlab kuchga kiradi. Tariflar o‘zgarishi bo‘yicha barcha ma’lumotlar quyidagi jadvallarda keltirilgan.

Viloyat “Issiqlik ta’minoti”

“Angren shahar issiqlik ta’minoti”

Chirchiq shahar “Issiqlik ta’minoti”

“Olmaliq shahar issiqlik ta’minoti”

Ikkita bojxona postida avtomobillar uchun “yashil” va “qizil” yo‘laklar joriy etiladi

Toshkent viloyatidagi “G‘ishtko‘prik” va “Zangiota” hamda Qoraqalpog‘istondagi “Dovut ota” bojxona postlarida avtotransport uchun “yashil” va “qizil” yo‘lakdan iborat ikki yo‘lakli tizim sinov tariqasida ishga tushiriladi.

“Yashil” yo‘lakda xavf darajasi past bo‘lgan avtomobillar va tovarlar hujjatlari tekshirilgandan so‘ng tezkor nazoratdan o‘tkazilishi ko‘zda tutilgan. “Qizil” yo‘lakda esa xavf darajasi yuqori bo‘lgan transportlar, shuningdek tanlab tekshirish uchun ajratilgan transportlar puxta ko‘zdan kechiriladi.

Avtomobillar xavf tahlili ma’lumotlariga asosan yo‘laklardan biriga yo‘naltiriladi. Bojxona xodimlari profaylinga asoslanib, avtomobilni “yashil” yo‘lakdan “qizil” yo‘lakka o‘tkazishlari mumkin. Bunda O‘zbekistonga kirib kelayotgan avtomobil faqat inspeksiya tekshiruvidan o‘tgandan keyingina yo‘laklardan biriga yo‘naltiriladi.

2026-yil 1-sentabrdan boshlab, tajriba-sinov natijalari asosida tizimni boshqa chegara o‘tish joylarida bosqichma-bosqich joriy etiladi.