Yaponiya hukumati O‘zbekistondagi afg‘on muhojirlari va aholining boshqa zaif qatlamlarini qo‘llab-quvvatlash uchun grant ajratadi. Bu haqda BMT Taraqqiyot dasturining O‘zbekistondagi vakolatxonasi xabar berdi.
Tomonlar o‘rtasidagi kelishuv 27-avgust kuni Yaponiya tashqi ishlar vaziri Takesi Ivayining tashrifi doirasida rasmiylashtirildi. Hujjatni Yaponiya elchisi Takasi Xatori, Yaponiya xalqaro hamkorlik agentligi vakolatxonasi rahbari Yoshibumi Bito va BMT Taraqqiyot dasturining O‘zbekistondagi vakili Akiko Fudziya imzoladi.
$3,3 mln miqdoridagi grant Surxondaryo viloyatida iqtisodiy faollikni rag‘batlantirish loyihasiga yo‘naltiriladi. Tashabbus mahalliy jamoalar va afg‘on fuqarolariga daromad olish imkoniyatlarini taqdim etishni maqsad qilgan.
Tashabbusning asosiy yo‘nalishlaridan biri Termiz yaqinidagi Afg‘oniston fuqarolarini o‘qitish uchun Ta’lim markazini modernizatsiya qilish bo‘ladi. Bu yerda zamonaviy STEM laboratoriyalari, shuningdek, kasbiy va texnik ko‘nikmalarni o‘rganish uchun majmualar tashkil etish rejalashtirilgan.
Markaz Afg‘onistondan kelgan o‘quvchilarga mahalliy ehtiyojlarga muvofiq qishloq xo‘jaligidan tortib IT va tibbiyotgacha bo‘lgan bir qator yo‘nalishlar bo‘yicha kurslarni taqdim etadi. Shuningdek, loyiha biznes-inkubator yaratish, mahorat darslari va amaliyotlarni tashkil etishni o‘z ichiga oladi.
300 ta mahalliy startap loyiha uchun zamonaviy uskunalar olib beriladi. Bu 150 ta yangi kompaniya tashkil etish va “Ayollar, tinchlik va xavfsizlik” (WPS) kun tartibiga muvofiq 1000 tagacha ish o‘rni yaratilishini ta’minlashi kutilmoqda.
“Hamkorlik Surxondaryoning barqaror rivojlanishi uchun drayver bo‘ladi, yoshlar, ayollar va mahalliy innovatorlar uchun eshiklarni ochadi, shuningdek, afg‘onistonliklarni yaxshi kelajak sari umumiy yo‘limizda qabul qilish imkonini beradi”, — dedi Akiko Fujii.
O‘zbekiston Iqtisodiyot va moliya vazirligi ham ish o‘rinlari yaratish va mahalliy yoshlarning mavqeini yaxshilash imkoniyatlarini qayd etdi. Yaponiya tomoni, o‘z navbatida, bir necha avlod uchun “barqaror va sifatli o‘sish"ni kutmoqda.
Avvalroq Spot O‘zbekistonda Yaponiyaning yetakchi oliy ta’lim muassasalari bilan hamkorlikda universitet tashkil etish rejalashtirilayotgani haqida yozgandi.
