Saudiya Arabistoni startapi arab va islom madaniyatiga ega bo‘lgan dunyodagi birinchi sun’iy intellekt chat-botini ishga tushirdi. Bu haqda Gizmodo nashri xabar berdi.
Yangi chat-bot — Humain Chat deb nomlanib, arab tilida yaratilgan va mintaqaning madaniyati, tili va qadriyatlarini namoyish etishga mo‘ljallangan.
Ar-Riyoddagi Humain startapi tomonidan ishlab chiqilgan ilova arab tilini mukammal biladigan, islom madaniyatini tushunadigan va ikki tilda oson suhbatlasha oladigan dunyodagi birinchi “halol sun’iy intellekt” sifatida e’tirof etilmoqda.
Bloomberg ma’lumotlariga ko‘ra, bot Allam nomli katta til modelida ishlaydi. Kompaniya ta’kidlashicha, bu model “tarixdagi eng yirik arab ma’lumotlar to‘plamlaridan biri” asosida o‘qitilgan va “dunyodagi eng ilg‘or arab tiliga asoslangan sun’iy intellekt modeli” hisoblanadi.
U nafaqat arab tilini mukammal bilishini, balki “islom madaniyati, qadriyatlari va merosini” ham chuqur tushunishini ta’kidlaydi. (Agar Humain Chat xizmatidan foydalanish borasida diniy jihatdan shubhalar tug‘ilsa, mahalliy imom bilan maslahatlashish tavsiya etiladi).
Ilova shaklida taqdim etiladigan ushbu chat-bot dastlab faqat Saudiya Arabistonida mavjud bo‘ladi. Hozirda u arab va ingliz tillarida suhbatlarni qo‘llab-quvvatlaydi, shu jumladan misr va livan kabi shevalarni ham tushunadi.
Uni Yaqin Sharqda joriy etish, keyinchalik esa butun dunyo bo‘ylab 500 millionga yaqin arab tilida so‘zlashuvchi insonlarga xizmat ko‘rsatish maqsadida global miqyosda tarqatish rejalashtirilgan.
Avvalroq Spot Apple yashirincha tarzda ChatGPTga raqobatchi yaratayotgani haqida yozgandi.
Kompaniya tashkil etgan jamoa savollarga javob berish uchun internetni skanerlash imkoniyatiga ega “javob mexanizmi"ni ishlab chiqadi.
