Rossiya va O‘zbekiston o‘rtasida transchegaraviy yuridik ahamiyatga ega elektron hujjat aylanishining qo‘shma tajriba loyihasi yakunlandi. Bu haqda RBC nashri xabar berdi.
Yangi raqamli yo‘nalish dastlabki ishtirokchilar uchun ochiq bo‘lib, biznes amaliyotida ham, davlatlararo hamkorlik doirasida ham o‘z samaradorligini allaqachon isbotlagan.
Loyiha quyidagilar tomonlar ishtirokida amalga oshirildi:
- Rossiya Federal soliq xizmati;
- O‘zbekiston Soliq qo‘mitasi;
- Rossiya va O‘zbekiston transchegaraviy EHA operatorlari: Tenzor kompaniyasi (Saby tizimi) va “Yangi texnologiyalar” ilmiy-axborot markazi;
- xorijiy elektron imzolarni tekshirish operatorlari: akkreditatsiyadan o‘tgan Gazinformservis (Rossiya) va Ilmiy-texnik va marketing tadqiqotlari markazi UNICON.UZ (O‘zbekiston).
Tovarning kuzatuv hujjatlarini ayirboshlashda elektron imzolarni o‘zaro tan olishning tashkiliy, huquqiy va texnologik asoslari yaratilgani tajribaning asosiy yutug‘i bo‘ldi.
Bu ikki mamlakat biznesiga yuridik ahamiyatga ega hujjatlarni raqamli shaklda — tez, xavfsiz va har ikki tomon qonunchiligiga rioya qilgan holda imzolash va olish imkonini berdi.
Pilot loyiha doirasida Gazinformservis va UNICON.UZ operatorlari ishonchli uchinchi tomon sifatida elektron imzolarni tekshirishni ta’minladilar. Bu esa har ikki mamlakat biznes va soliq idoralari uchun tovar kuzatuv hujjatlarini qonuniylashtirish imkonini berdi.
Elektron shaklga o‘tish imzolash muddatini haftalardan daqiqalargacha qisqartirib, operatsion samaradorlik va mablag‘lar aylanmasini oshiradi. O‘zbekiston YOII a’zosi emasligini hisobga olgan holda, ushbu loyiha elektron imzoni xalqaro miqyosda tan olish amaliyotini kengaytirish va tashqi savdoda elektron hujjat aylanmasi asoslarini shakllantirishda muhim qadam bo‘ldi.
Avvalroq Spot O‘zbekiston va Rossiya ikki mamlakat o‘rtasida parvozlar sonini haftasiga 1000 tadan oshirishi haqida yozgandi.
Qayd etilishicha, Toshkentdan Moskvaga 100 tagacha, Samarqanddan Moskvaga 46 ta reys amalga oshirilishi rejalashtirilgan.
