Sirdaryo tumanida Peng Sheng Wenren Zhigu loyihasi qurilishi boshlandi. Bu haqda viloyat hokimligi matbuot xizmati xabar berdi.
70 gektar maydonda barpo etiladigan mazkur loyiha doirasida zamonaviy polietilen quvurlar, keramika sanitariya vositalari, qishloq xo‘jaligida urug‘chilik kompleksi hamda urug‘larning genetik tozaligini taʼminlaydigan molekulyar-genetik tahlil laboratoriyasi tashkil etiladi.
Loyiha korxonalar uchun xorijiy bozorlarga chiqishning qulay platformasi, jahon investitsiyalari uchun esa strategik markaz sifatida xizmat qiladi.
Park hududida joylashadigan integratsiyalashgan bojxona xizmati yuqori samarali bojxona rasmiylashtiruvini taʼminlaydi.
“Bu tashabbus Sirdaryoning sanoat va agrosanoat salohiyatini yangi bosqichga olib chiqib, yangi ish o‘rinlari, yuqori texnologiyalar, samaradorlik va eksport imkoniyatlarini kengaytirishi bilan ahamiyatli bo‘ladi”, deyiladi xabarda.
Xitoy kompaniyasi Farg‘onada sanoat parkini tashkil etishni rejalashtirayotgani haqida xabar berilgandi.
Spot, avvalroq, Xitoy kompaniyasi Andijonda $500 mlnlik temiryo‘l va avtologistika yo‘nalishini tashkil etishi haqida yozgandi.
