2026-yildan Tashabbusli budjet doirasida “Deputatlar tashabbusi” amaliyoti joriy etiladi. Bu haqda prezidentning tegishli qarori qabul qilindi.
Qarorga ko‘ra, 2026-yildan Tashabbusli budjet jarayonlari doirasida g‘olib bo‘lmagan loyihalarni deputatlar tashabbusiga ko‘ra g‘olib deb e‘lon qilish amaliyoti joriy etiladi.
Taʼkidlanishicha, bu — xalq vakillari va saylovchilar o‘rtasida hamkorlikni kuchaytirish maqsadida joriy etilmoqda.
Bunda Qonunchilik palatasi deputatlari har yili Tashabbusli budjet jarayonlari doirasida tegishli saylov okruglarida g‘olib bo‘lmagan loyihalar orasidan ikkita loyihani (har mavsumda bittadan) Ochiq budjet axborot portalida tanlaydi.
Tanlangan loyihalar portalda avtomatik ravishda g‘olib deb topiladi va ushbu loyihalar budjetdan moliyalashtiriladi.
Moliyalashtiriladigan loyihalar uchun alohida sahifa tashkil etilib, shu turdagi barcha loyihalarning jamoatchilik uchun ochiq ro‘yxati yuritiladi.
Ushbu xarajatlarni moliyalashtirish uchun har bir deputatga bir yilda ikki mavsum uchun BHMning 8 ming baravari miqdorida (amalda 3,3 mlrd so‘m) mablag‘ har yilgi budjetda nazarda tutiladi.
Tashabbusli budjetning 2025-yilgi 2-mavsumi doirasida ovoz berish bosqichi 22-avgust kunidan boshlangan edi.
Ushbu mavsum doirasida fuqarolar tomonidan 22,6 mingdan ortiq takliflar kelib tushgan va 18 656 ta taklif saralash bosqichidan o‘tkazildi.
Ovoz berish jarayonlari 31-avgust kuni soat 23:59 da yakuniga yetadi.
