O‘zbekistonda sakkiz oyda 5 mln nafar aholining bandligi taʼminlandi. Bu haqda Shavkat Mirziyoyev Mustaqillikning 34 yilligiga bag‘ishlangan bayram tadbirida so‘zlagan nutqida aytib o‘tdi.
Davlat rahbari O‘zbekistonda tadbirkorlik iqtisodiyotni harakatga keltiruvchi, oldinga boshlovchi katta kuchga aylanganini taʼkidladi.
Shuningdek, sakkiz yilda yalpi ichki mahsulot 2 karra oshib, o‘tgan yili $115 mlrdga, eksport hajmi $26 mlrdga yetgani, yil yakuni bilan YIM $130 mlrd bo‘lishi aytildi.
Oltin-valyuta zaxiralar tarixda ilk bor $48 mlrddan oshdi. O‘tgan sakkiz yilda O‘zbekistonga qariyb $130 mlrd xorijiy investitsiyalar kirib keldi.
“Bularning barchasi islohotlar samarasi, taraqqiyotimizning mustahkam kafolati, nufuzli moliya institutlari va xorijiy kompaniyalarning yuksak ishonchi tufaylidir”, — dedi prezident.
Davlat rahbarining so‘zlariga ko‘ra, 2025-yili jami $35 mlrd investitsiya evaziga 9 mingga yaqin yangi korxona, xizmat ko‘rsatish majmualari barpo etiladi.
Ushbu bayram arafasida $4 mlrdlik 79 ta yirik obyekt ishga tushirildi.
“O‘tgan davrda birgina kichik va o‘rta tadbirkorlar soni 2 karra ko‘paydi. Bugun ushbu tarmoqda 10 mlndan ortiq aholimiz mehnat qilib, daromad topmoqda.
Biz yil boshida 5,5 mln aholi bandligini taʼminlash bo‘yicha katta marra olgan edik. Sakkiz oydayoq 5 mlnlik rejani uddaladik", — dedi Shavkat Mirziyoyev.
Prezident joriy yilning o‘zida chetda ishlayotgan 700 ming fuqaro mamlakatga qaytganini qo‘shimcha qildi.
O‘zbekistonda ishsizlik darajasi 5,1% gacha kamaygani haqida xabar berilgandi.
Avgust oyi avvalida Shavkat Mirziyoyev hozirda band bo‘lmagan 92 ming bitiruvchini ishga joylashtirish va qo‘shimcha ish o‘rinlarini yaratish yo‘nalishlarini ko‘rsatib o‘tgandi.
Spot, avvalroq, 1-iyul holatiga O‘zbekistonda kambag‘allik darajasi 6,8% gacha pasaygani haqida yozgandi.
