Tashabbusli budjet loyihalarini aholi va davlat o‘rtasida sherikchilik asosida moliyalashtirish imkoniyati yaratiladi. Bu haqda prezidentning tegishli qarorida belgilab qo‘yildi.
Sheriklik asosida moliyalashtirish tartibi 2026-yildan boshlab joriy etiladi.
Bunda, tashabbuskor aholi tomonidan loyihalar qiymatining 50% qismi ixtiyoriy ravishda moliyalashtirilgan taqdirda loyihalar avtomatik ravishda g‘olib deb topiladi va qolgan 50% i budjetdan moliyalashtiriladi.
Loyihalar sheriklik asosida moliyalashtirilganda ovoz berishda ishtirok etmagan holda g‘olib deb topiladi va tegishli mahallalarga tanaffus berish amaliyoti qo‘llanmaydi.
Shuningdek, 2025-yil 1-oktabrga qadar Ochiq budjet axborot portalida g‘olib bo‘lgan loyihalarning interaktiv xaritasi ishga tushiriladi.
Tashabbusli budjet doirasida “Deputatlar tashabbusi” amaliyoti joriy etilishi haqida xabar berilgandi.
Ma’lumot uchun, Tashabbusli budjetning 2025-yilgi 2-mavsumi doirasida ovoz berish bosqichi 22-avgust kunidan boshlangan edi.
Ushbu mavsum doirasida fuqarolar tomonidan 22,6 mingdan ortiq takliflar kelib tushgan va 18 656 ta taklif saralash bosqichidan o‘tkazildi.
Ovoz berish jarayonlari 31-avgust kuni soat 23:59 da yakuniga yetadi.
