Oliy ta’lim, fan va innovatsiyalar vazirligi nodavlat oliy ta’lim tashkilotlariga berilgan yangi litsenziyalar bo‘yicha rasmiy bayonot berdi.
29-avgust kuni soat 06:19 dan 09:53 gacha license.gov.uz axborot tizimida texnik nosozlik yuzaga kelgan. Natijada, ko‘rib chiqish muddati tugamagan arizalar bo‘yicha ayrim nodavlat OTMlarning amaldagi litsenziyalariga o‘zgartirish kiritish haqidagi so‘rovlariga tizim tomonidan belgilangan talab buzilgan holda ijobiy xulosalar shakllantirilgan.
“Mazkur holat texnik xatolik hisoblanib, hozirda uning sabablari tegishli idoralar bilan hamkorlikda chuqur o‘rganilmoqda. Yakuniy xulosalar bo‘yicha qo‘shimcha ma’lumot jamoatchilikka taqdim etiladi”, deyiladi xabarda.
Shu bilan birga, quyida nomlari keltirilgan ta’lim tashkilotlariga yangi ta’lim yo‘nalishlari, mutaxassisliklari, ta’lim shakllari hamda faoliyat manzillari bo‘yicha qabul jarayonlarini tashkil etish uchun hech qanday ruxsat berilmagan:
- Profi University — yurisprudensiya ta’lim yo‘nalishi, masofaviy shakl va barcha magistratura mutaxassisliklariga.
- Sharq University — bank ishi, buxgalteriya hisobi ta’lim yo‘nalishlari va barcha kechki va masofaviy shakllarga;
- University of Business and Science — masofaviy ta’lim shakllariga;
- Osiyo xalqaro universiteti — ayrim masofaviy ta’lim shakllariga hamda Xorazm viloyati, Urganch shahridagi yangi faoliyat manziliga;
- Iqtisodiyot va pedagogika universiteti — tibbiyot yo‘nalishlari va magistratura mutaxassisliklari, masofaviy ta’lim shakllari hamda Surxondaryo viloyati, Denov tumanidagi yangi faoliyat manziliga;
Vazirlik mazkur ta’lim tashkilotlari tomonidan yuqoridagi yo‘nalishlar, mutaxassisliklar, ta’lim shakllari hamda faoliyat manzillari bo‘yicha e’lon qilinayotgan ma’lumotlar asossiz hisoblanishini qayd etgan.
Undan keyin Adliya vazirligi “Litsenziya” axborot tizimida texnik nosozliklar hamda ruxsat etilmagan harakatlar kuzatilmagani va tizim shtat rejimida ishlayotganini ma’lum qildi.
Avgust oyi boshida Vazirlar Mahkamasi ta’lim muassasalarini davlat akkreditatsiyasidan o‘tkazish to‘g‘risidagi nizomni tasdiqladi. Taʼlim dasturlarini maxsus davlat akkreditatsiyasidan o‘tkazish to‘g‘risida arizalar kelgusi o‘quv yilida faoliyatini boshlash uchun har yili 1-oktyabrdan kelgusi yilning 31-yanvarigacha qabul qilinadi.
Avvalroq Spot O‘zbekistonda Yaponiyaning yetakchi oliy ta’lim muassasalari bilan hamkorlikda universitet tashkil etish rejalashtirilayotgani haqida yozgandi.
