Avvalroq Shavkat Mirziyoyev va Xitoy raisi Si Szinpin Pekinda muzokara o‘tkazgani haqida xabar berilgandi. Davlat rahbarlari sanoat mahsulotlari va qishloq xo‘jaligi mahsulotlarini o‘zaro yetkazib berish orqali tovar ayirboshlashni $20 mlrdga yetkazishni muhokama qildilar.
Energetika vaziri Jo‘rabek Mirzamahmudov O‘zbekiston 24 telekanaliga bergan intervyusida ShHT mamlakatlari birgalikda ishlash, investitsiya loyihalarini amalga oshirish va o‘zaro bog‘liqlikni oshirish, jumladan, Markaziy Osiyo energetika tizimining boshqa davlatlar bilan hamkorligini kengaytirish bo‘yicha takliflarni muhokama qilganini aytdi.
“Bugungi kunda Xitoy bizning energetika sohasidagi eng yirik ham investitsiyaviy, ham texnologik hamkorimizdir. Xitoydan nafaqat investitsiyalar, balki xorijdan olib kelinadigan deyarli barcha asosiy texnologik uskunalar ham keladi. Sababi Xitoy bu yo‘nalishda eng zamonaviy texnologiyalarga ega”, — deya o‘z fikrlari bilan o‘rtoqlashdi vazir.
Energetika vazirligi rahbari Xitoy bilan O‘zbekistonda gidroakkumulyatsiya stansiyalarini (GAES) qurish loyihalarini amalga oshirish bo‘yicha kelishuvlarga erishilganini ma’lum qildi.
Shuningdek, tomonlar yangi elektr uzatish liniyalarini qurish va foydalanishga topshirish bo‘yicha uzoq muddatli kelishuvga erishdilar.
Bundan tashqari, Toshkentdagi elektr ta’minoti muammolarini bartaraf etish maqsadida Xitoydan ko‘chma mobil podstansiyalar keltiriladi. Ushbu podstansiyalardan doimiy podstansiyalarni ta’mirlash vaqtida foydalanish rejalashtirilgan.
Yana bir yo‘nalish — China Datang Corporation bilan hamkorlikda kadrlar tayyorlash. Mahalliy mutaxassislar qayta tiklanadigan energetika sohasida ta’lim olib, malaka oshiradilar.
2023-yil oktabrda O‘zbekgidroenergo va China Southern Power Grid International kompaniyalari Toshkent viloyatida $1 mlrd qiymatidagi gidroakkumulyatsiya stansiyasini qurish bo‘yicha kelishuv imzoladilar.
Avgust oyi boshida energetika vaziri Jo‘rabek Mirzamahmudov Toshkent aholisi va poytaxt tadbirkorlarini barqaror elektr ta’minoti bilan ta’minlash uchun 1,8 trln so‘m ajratilgani haqida ma’lum qildi. Bu mablag‘lar 14 ta yuqori kuchlanishli podstansiyadagi yuqori kuchlanishli transformatorlarni almashtirish, uskunalarni yangilash va kabellarni yotqizishga yo‘naltiriladi.
Joriy yil oxirigacha 374 kilometr elektr tarmoqlari, 11 ta podstansiya va 62 ta transformatorni yangilash rejalashtirilmoqda. 2026-yilga kelib esa, mahallalardagi yana 788 kilometr tarmoq, 35 ta podstansiya va 145 ta transformator modernizatsiya qilinadi.
Avvalroq Spot Xitoyning CNPC kompaniyasi O‘zbekistonda yerosti gaz omborlarini qurishni rejalashtirayotgani haqida yozgandi.
