Kambag‘allikni qisqartirish va bandlik vazirligi Air Samarkand xususiy aviakompaniyasidan oylik ish haqi bo‘yicha 1,5 mlrd so‘m qarzdorlikni undirishni talab qilmoqda, deb xabar berdi vazirlik matbuot kotibi Gulnoza Alimova.
Bandlik vazirligi Air Samarkand xodimlariga ish haqi to‘lanmayotgani bilan bog‘liq vaziyatni nazoratga oldi. Juma kuni holatiga ko‘ra, idoraga aviatashuvchi xodimlaridan o‘nga yaqin ariza kelib tushgan.
“Ularning iyun-avgust oylarida to‘lanmagan uch oylik ish haqlarini undirish yuzasidan Davlat mehnat inspeksiyasi tomonidan jami 1,5 mlrd. so‘mlik da’vo arizalari kiritildi”, — deyiladi xabarda.
Da’vo talabida qonunchilikka asosan kechiktirilgan har bir kun uchun pulli kompensatsiyani qo‘shib hisoblagan holda undirib berishni so‘rab, fuqarolik ishlari bo‘yicha Samarqand shahar sudiga murojaat qilingan.
Bandlik vazirligi matbuot xizmatining eslatishicha, fuqarolar mehnat faoliyati masalalari bo‘yicha 1176 yoki (71) -200−06−00 ishonch raqamlari, shuningdek, munosibmehnat_bot Telegram-boti orqali murojaat qilishlari mumkin.
SHOT Telegram-kanali o‘tgan haftada Air Samarkand aviakompaniyasining rossiyalik ishchilari iyun oyidan beri maoshlar kechikayotgani haqida shikoyat qilgani haqida xabar bergan edi. Kanal ma’lumotlariga ko‘ra, 50 ga yaqin kishi uch oy davomida o‘zbekistonlik tashuvchidan uy-joy ijarasi va “hatto oziq-ovqat” uchun pul olmagan.
Kompaniyaning ba’zi xodimlari allaqachon ishdan bo‘shashgan, dedi SHOT suhbatdoshlari. Ularning so‘zlariga ko‘ra, xuddi shunday holat joriy yilning bahorida ham kuzatilgan, biroq uchuvchilar, bort kuzatuvchilari va boshqa xodimlar o‘sha paytda maosh to‘lanishiga erishgan.
Air Samarkand xususiy aviakompaniyasi ijtimoiy tarmoqlar va OAVda xodimlarning ish haqi kechiktirilgani haqidagi ma’lumotlarga izoh berdi.
Tashuvchi “ish haqini to‘lash muddatiga ta’sir ko‘rsatgan moliyaviy chaqiruvlar” mavjudligini tasdiqladi. Joriy yilning bahor va yoz oylarida havo kemalari parkiga rejadan tashqari texnik xizmat ko‘rsatish “katta va rejalashtirilmagan xarajatlar"ni keltirib chiqardi, deya ta’kidladi kompaniya matbuot xizmati.
