YouTube foydalanuvchilarga mobil ilovada qisqa Shorts videolarini ko‘rish uchun kunlik cheklov belgilash imkonini beruvchi yangi funksiyani joriy qilishni boshladi. Bu haqda The Verge yozmoqda.
Hisob sozlamalarida mavjud bo‘lgan moslanuvchan cheklov tomoshabinlarga vertikal videolar tasmasidagi ko‘rish vaqtini boshqarishda yordam berish uchun mo‘ljallangan.
Belgilangan chegaraga yetganda, foydalanuvchi joriy kun davomida Shorts’ni to‘xtatish haqida xabar oladi, biroq bu xabarni e’tiborsiz qoldirish mumkin — chegaralarga rioya qilish ixtiyoriy holda qoladi.
Instagram va TikTok shunga o‘xshash ekran vaqtini boshqarish vositalarini taklif qiladi. Shu bilan birga, TikTok bunday funksiyani platformaning veb-versiyasiga tarqatgan yagona xizmatdir.
“Shorts — YouTube tajribasining asosiy tarkibiy qismidir. Videolar tasmasi aylantirilish vaqtining cheklanishi foydalanuvchilarga kontentni o‘rganish imkoniyatini berish bilan birga, ularga tomosha qilish odatlariga ongliroq yondashish va o‘z vaqtlaridan samarali foydalanishga yordam beradi”, — deb ta’kidlanadi videoxosting bayonotida.
Funksiyani ishga tushirish mobil qurilmalardan boshlandi. Bu imkoniyat barcha foydalanuvchilarga yetib borishi uchun ma’lum vaqt talab etilishi mumkin.
YouTube 2025-yil oxirigacha bolalar ekran vaqtini faol boshqarish maqsadida ushbu sozlamani ota-ona nazorati bo‘limiga kiritishni rejalashtirmoqda.
Bu rejimda belgilangan vaqt chegarasidan oshib ketganligi haqidagi ogohlantirishlarni bekor qilish imkoni bo‘lmaydi.
Avvalroq Spot YouTube uzun videolarni ko‘rishning Shortsga o‘xshash yangi formatini sinovdan o‘tkazayotgani haqida yozgandi.
