YouTube sun’iy intellekt yordamida past aniqlikdagi video sifatini avtomatik ravishda oshiradigan yangi funksiyani ishga tushirganini e’lon qildi. Bu haqda GSMArena nashri xabar berdi.
Platforma 1080p dan past aniqlik bilan yuklangan videolarni kengaytiradi va kelajakda 4K gacha sun’iy intellektni qo‘llab-quvvatlashni ham joriy etishni rejalashtirmoqda.
Bunda ham mualliflar, ham tomoshabinlar avtomatik yaxshilanishdan voz kechish imkoniyatiga ega bo‘ladilar.
Kompaniya ta’kidlashicha, asl fayllar va videoning dastlabki aniqlik darajasi o‘zgarishsiz saqlanib qoladi, asl nusxa va yaxshilangan versiya o‘rtasidagi tanlov esa sozlamalar bo‘limida mavjud bo‘ladi.
YouTube vakili Veronika Navarretening The Verge’ga bergan izohida aniqlik kiritishicha, funksiya faqat 240p dan 720p gacha bo‘lgan dastlabki aniqlikdagi videolarga qo‘llaniladi.
Ya’ni, u allaqachon raqamlashtirilgan yoki Full HD formatga o‘tkazilgan eski videolarga ta’sir qilmaydi.
Bunday sun’iy intellektga asoslangan masshtablash texnologiyalarini televizor va media pleer ishlab chiqaruvchilari, jumladan Nvidia Shield TV, uzoq vaqtdan beri qo‘llab kelmoqda.
Ammo YouTube’ning yangi funksiyasining o‘ziga xos jihati shundaki, foydalanuvchilar uni ishlatishdan voz kechish imkoniyatiga ega bo‘ladi.
Bunda imkoniyatning muhimligi qayd etilmoqda. Chunki ilgari mualliflar platforma algoritmlarining ba’zan ular bilmagan holda avtomatik tarzda “yaxshilanishlarni” qo‘llashi, natijada tafsilotlarning yo‘qolishi yoki noxush artefaktlarning paydo bo‘lishiga olib kelishi haqida bir necha bor shikoyat qilishgan.
Avvalroq Spot YouTube layk uchun yangi animatsiyalarni qo‘shgani haqida yozgandi. Qayd etilishicha, tugma endi foydalanuvchiga yoqqan kontent turiga moslashadi.
