Toshkent shahridagi qurilish obyektlarida maxsus ishchi guruhi tomonidan nazorat tadbirlari o‘tkazilmoqda. Bu haqda Toshkent shahar Qurilish inspeksiyasi xabar berdi.
Nazorat ishlari Toshkentda ekologik vaziyatni yaxshilash hamda qurilish jarayonida belgilangan sanitariya-gigiyena talablariga qat‘iy rioya etilishini ta‘minlashga qaratilgan.
Jarayonda 218 ta qurilish obyekti o‘rganildi. Tadbir davomida 106 qurilish obyektida chang va qum zarrachalarining havoga ko‘tarilishini bartaraf etishga doir talablarning buzilishi aniqlandi.
Yana 25 ta holatda ifloslantiruvchi moddalarning yo‘l qo‘yiladigan doiradagi normativlardan ortiq darajada atmosfera havosiga chiqarilishiga yo‘l qo‘yilgani maʼlum bo‘ldi. 148 ta holatda qurilish maydonining 25%i ko‘kalamzorlashtirilmagani qayd etildi.
Holatlar yuzasidan 40 ta qurilish obyektida suv purkagich uskunalari o‘rnatildi, 116 ta obyektda avtotransport vositalari g‘ildiraklarini yuvish hovuzlari barpo etildi.
28 ta obyektda esa qurilish-montaj ishlari vaqtincha to‘xtatildi, 174 nafar quruvchi tashkilot vakili ogohlantirilib, 145 nafari ma‘muriy javobgarlikka tortildi.
Toshkentda qurilish maydonchalarida chang hosil bo‘lishiga qarshi kuchaytirilgan nazorat qilish boshlangani haqida xabar berilgandi.
Spot, avvalroq, poytaxtda havo ifloslanishi tufayli 15 ta qurilish to‘xtatilgani haqida yozgandi.
