O‘zbekiston Litva bilan qishloq xo‘jaligi, IT, kiberxavfsizlik, logistika va elektron tijorat bo‘yicha hamkorlikni kengaytiradi. Bu haqda Savdo-sanoat palatasi xabar berdi.
Palata raisi maslahatchisi Alisher Shayxov Litva Tashqi ishlar vaziri o‘rinbosari Taumaris Valis bilan uchrashuv o‘tkazdi.
Tomonlar ikki davlat o‘rtasidagi savdo, investitsiya va innovatsiya sohalaridagi hamkorlikni yana-da rivojlantirishga qaratilgan imkoniyatlarni ko‘rib chiqdi.
Alisher Shayxov GSP+ preferensiyalari, Yevropa Ittifoqining texnik ko‘mak dasturlari va taʼlim hamda innovatsiya sohasidagi qo‘shma loyihalarning ahamiyatini taʼkidladi.
Shuningdek, qishloq xo‘jaligi, IT, kiberxavfsizlik, logistika va elektron tijorat bo‘yicha hamkorlikni kengaytirish yo‘nalishlarini taklif etdi. Litvaning startaplar va venchur ekotizimini rivojlantirish borasidagi tajribasi O‘zbekiston uchun muhim ekani aytildi.
Taumaris Valis O‘zbekiston bilan amaliy natijalarga qaratilgan hamkorlikni chuqurlashtirishga tayyorligini bildirdi. U ikki mamlakatning savdo-sanoat palatalari o‘rtasida biznes aloqalarini kuchaytirish muhimligini qayd etdi.
Uchrashuv yakunida tomonlar startaplar, innovatsiyalar, logistika va raqamli texnologiyalar sohalarida qo‘shma loyihalarni amalga oshirishga tayyor ekanliklarini tasdiqladi.
Oktabr oyi oxirida sunʼiy intellekt asosidagi startaplarni qo‘llab-quvvatlash uchun $100 mln ajratilishi belgilangandi.
Spot, avvalroq, Markaziy bank huzurida ustav fondi $50 mlnlik venchur fond tashkil etilishi haqida yozgandi.
