Salomatligi xavfsizlik kamari taqish imkonini bermaydigan kasalliklar ro‘yxati Adliya vazirligida davlat ro‘yxatidan o‘tkazildi.
Ushbu kasalliklar mavjudligi bo‘yicha QR-kodli tibbiy maʼlumotnoma “Elektron sog‘liqni saqlash” axborot tizimi orqali rasmiylashtiriladi.
Maʼlumotnoma bemor biriktirilgan birlamchi tibbiy-sanitariya yordami muassasasi yoki bemor davolangan davlat tibbiyot muassasasi tomonidan bepul beriladi.
Ro‘yxatga jami 20 turdagi kasallik va holatlar kiritilgan. Ular:
- O‘mrov va to‘sh suyagi sinishi
- Yelka kamari sinishi
- Qovurg‘alar sinishi
- Chap o‘mrov suyagi chiqishi tufayli o‘tkazilgan operatsiyalar
- Chap o‘mrov suyagining soxta bo‘g‘imi sinishi
- Umurtqa pog‘onasining kompression sinishi
- O‘pkaning surunkali obstruktiv kasalliklari (IV bosqich)
- Bronxial astma (IV bosqich)
- O‘pkaning interstitsial zararlanishi (fibroz va boshqalar)
- O‘pkaning bir qismi yoki butun qismining (chap yoki o‘ng) olib tashlanishi (lobektomiya, pnevmonektomiya)
- Surunkali yurak yetishmovchiligining III bosqichi va dekompensatsiya bosqichi
- Og‘ir yurak-qon tomir kasalliklari (o‘tkazilgan infarktlar, ishemiya va boshqalar)
- III darajali (morbid) semizlik (Tananing massa indeksi ≥ 40)
- Past bo‘yli (nanizm) 150 santimetrdan past
- Qo‘l yoki kelka harakatini cheklovchi nevrologik kasalliklar
- Tananing ko‘krak qismida joylashgan og‘ir allergik yoki dermatologik kasalliklarning og‘ir shakllari (ekzema, psoriaz va boshqalar)
- O‘mrov, kurak, yelka, to‘sh suyaklari va qovurg‘alarda ichki va tashqi implantlarning mavjudligi
- Ko‘krak qafasi va qorin bo‘shlig‘ida o‘tkazilgan ochiq turdagi operatsiyalar
- Stomalar mavjud bo‘lishi
- Ko‘krak qafasi sohasidagi yirik hosilalar (o‘sma)
Maʼlumotnoma 1 yil muddatga beriladi. Ayrim holatlarda bu muddat o‘zgarishi mumkin.
Avvalroq davlat tibbiy sug‘urtasida bepul statsionar yordam joriy etilishi 6 oyga kechiktirilgandi.
