Avvalroq prezidentning ichki ishlar organlarining migratsiya va personallashtirish sohasidagi faoliyatini raqamlashtirish orqali sifatini yaxshilash to‘g‘risidagi qarori qabul qilingani haqida xabar berilgandi.
Hujjat bilan, IIVga 1-avgustgacha migratsiya va shaxsni identifikatsiyalash sohasida davlat xizmatlarini ko‘rsatish va onlayn huquqiy maslahatlar berish uchun Passport-Visa mobil ilovasini ishlab chiqish topshirildi.
Fuqarolar ilova orqali kam yuklamali migratsiya bo‘linmalari haqida ma‘lumot olishlari mumkin bo‘ladi. Ilova Pasport-viza avtomatlashtirilgan axborot tizimi majmuasining tarkibiy qismiga aylanadi.
Shuningdek, migratsiya sohasidagi xizmatlarni ko‘rsatishda (masalan, ro‘yxatdan o‘tkazishda) shaxsni masofadan aniqlash va uchinchi shaxslarning roziligini olish uchun E-Rozilik platformasini ishga tushirish rejalashtirilmoqda. Jarayonlar Pasport-viza majmuasining Face ID moduli orqali amalga oshiriladi.
1-sentabrdan boshlab o‘zbekistonliklar chet elda istiqomat qilayotgan vatandoshlari va ularning oila a‘zolari uchun Yagona interaktiv davlat xizmatlari portali hamda davlat xizmatlari markazlari orqali mamlakatga taklif qilish hujjatlarini rasmiylashtira oladilar.
Fuqaroligi bo‘lmagan shaxslar biometrik yo‘l hujjati uchun onlayn murojaat qilishlari mumkin bo‘ladi. Bundan tashqari, YIDXP va davlat xizmatlari markazlari orqali turgan joyi bo‘yicha ro‘yxatdan o‘tkazishni bekor qilish to‘g‘risida murojaat qilish imkoniyati yaratiladi.
Joriy yil oxirigacha Shaxsni identifikatsiyalash markazining ma‘lumotlar bazasini Pasport-viza majmuasi bilan integratsiyalashni ta‘minlash topshirildi. Migratsiya sohasida shaxsga doir ma‘lumotlarni to‘plash uchun Yagona raqamli migratsiya (Digital Migration Platform) platformasi yaratiladi.
Avvalroq Spot O‘zbekiston 2030-yilgacha vizasiz rejimni 50 tagacha mamlakatga kengaytirishni rejalashtirayotgani haqida xabar bergan edi.
