Avvalroq prezident raisligida 18-mart kuni Samarqand viloyatini ijtimoiy-iqtisodiy rivojlantirish masalalari bo‘yicha yig‘ilish o‘tkazilgani haqida xabar berilgandi.
Unda davlat rahbari turizm sohasidagi vazifalarni belgilab berdi. Xalqaro turizm bozoridagi noaniqlik holatida O‘zbekistonni xavfsiz turistik yo‘nalish sifatida targ‘ib qilish bo‘yicha katta kampaniya boshlanishi ta‘kidlandi.
Bu jarayonda turizm uchun eng qulay davr bo‘lgan aprel-iyun oylari bo‘yicha alohida dastur tayyorlanib, O‘zbekistonda ochiq turizm mavsumi e‘lon qilinadi.
Ushbu muddat davomida aviakompaniyalarga yangi reyslarni yo‘lga qo‘yib, olib kelingan har bir xorijiy sayyoh uchun $100 dan subsidiya beriladi. Bunday aviakompaniyalarga aeroport xizmatlari uchun 20% chegirma taqdim qilinadi.
Yig‘ilishda mahalliy turoperatorlar uchun ham yangiliklar e‘lon qilindi. Xususan, 1-apreldan boshlab turoperatorlarga uch oy davomida jalb qilingan 1 ming xorijiy turist uchun budjetdan $5 minggacha subsidiya beriladi. Qo‘shilgan qiymat solig‘ining yarmi “keshbek” sifatida qaytariladi.
Ijtimoiy tarmoqlarda 5 mlndan ortiq kuzatuvchisi bo‘lgan 50 ta xorijiy blogerga O‘zbekistonga kelishi uchun yetti kunlik bepul turpaket taqdim etiladi.
Dunyodagi eng yirik onlayn sayyohlik platformalarida O‘zbekistonga sayohat targ‘iboti bilan bog‘liq xarajatlar ham qoplab beriladi.
Joriy yilning o‘zida dunyoga mashhur bo‘lgan kamida 5 ta san‘atkorning gastrolini, shuningdek, 10 ta biznes forumi va moda festivalini Samarqandda o‘tkazish muhim ekani ta‘kidlandi.
Shu bilan birga, Samarqandni aniq va tabiiy fanlar bo‘yicha olimpiada, forum va ilmiy konferensiyalar o‘tkazadigan xabga aylantirish uchun barcha imkoniyatlar borligi ko‘rsatib o‘tildi.
Masalan, 2028-yilda Samarqandda o‘tkaziladigan Xalqaro astronavtika kongressida hozirning o‘zida yuzdan ortiq davlatdan 10 mingga yaqin odam ishtirok etish istagini bildirgan.
Mutasaddilarga mazkur yo‘nalishdagi xalqaro tashkilotlar bilan ishlab, maxsus dastur ishlab chiqish topshirildi.
Bu imkoniyatlar hisobiga Samarqandga yil yakunigacha 6 mln turist olib kelish maqsadi belgilab olindi.
Avvalroq 2-maydan Toshkent-Xiva yo‘nalishida Hyundai Rotem tezyurar poyezdi qatnay boshlashi haqida xabar berilgandi.
