Yil boshidan buyon xorijlik sayyohlar O‘zbekistonga bir yil oldingiga nisbatan uchdan bir qismga ko‘proq tashrif buyurdi, deya xabar berdi Milliy statistika qo‘mitasi.
Yanvar-fevral oylarida 1,776 mln nafar chet el fuqarolari turistik maqsadlarda mamlakatga kelgan. Bu 2025-yilning shu davriga nisbatan 441 ming kishiga yoki 33% ga ko‘pdir.
Qirg‘iziston O‘zbekistonga sayohatlar soni bo‘yicha birinchi o‘rinni saqlab turibdi. Ikki oyda 521,1 ming kishi O‘zbekistonga sayohat qilgan, bu o‘tgan yilgi ko‘rsatkichdan 23,3% ga ko‘pdir.
Ikkinchi o‘rinda Tojikiston qayd etilgan — 469 mingta sayyoh. Bu 2023-yilgi darajadan 16,8% ga oshgan. Kuchli uchlikni 386,2 mingta sayyoh bilan Qozog‘iston yakunlab bergan, bu esa o‘tgan yilgiga qaraganda 94% ga ko‘p.
Rossiya fuqarolari O‘zbekistonga 123,3 ming marta sayohat qilgan, bu o‘tgan yilga nisbatan 36% ga ko‘pdir. Afg‘onistondan sayohatlar soni sezilarli darajada kamtarona o‘sishni ko‘rsatdi — 2,2% ga, 83,6 ming martagacha. Yana 51,2 ming sayohat Turkmanistonga to‘g‘ri keldi (+4,8%).
Dastlabki ikki oyda Xitoydan kelgan sayyohlar soni 49 080 kishiga yetdi. Vizasiz rejim joriy etilishi fonida bu ko‘rsatkich 2025-yildagi darajadan 3,5 baravar oshdi.
Turkiyadan O‘zbekistonga 24,2 mingta safar amalga oshirilgan, bu o‘tgan yilga nisbatan 7,5% ga ko‘pdir. Hindiston esa 9,4 mingta safar bilan (-8,6%) pasayish ko‘rsatgan kuchli o‘nlikdagi yagona davlat bo‘ldi. O‘nlikni Janubiy Koreya yakunlaydi — 5 398 kishi (+2%).
2025-yil davomida 11,7 mlnga yaqin xorijiy fuqaro O‘zbekistonga turistik maqsadlarda tashrif buyurdi. Dastlabki o‘rinlarni Qirg‘iziston, Tojikiston va Qozog‘iston egallagan bo‘lsa, Xitoy eng yuqori o‘sishni namoyon etdi — 2024-yilga nisbatan qariyb 4 barobar.
Avvalroq O‘zbekistonda aprel-iyun oylari ochiq turizm mavsumi bo‘lishi haqida xabar berilgandi.
Aviakompaniyalar olib kelgan turist uchun $100 dan, turoperatorlarga 1 ming sayyoh uchun $5 minggacha subsidiya beriladi.
