2025-yilning yanvar-iyun oylarida O‘zbekistonda avtomobil ishlab chiqarish biroz oshdi, deya xabar bermoqda Milliy statistika qo‘mitasi.
Birinchi yarim yillikda 185,6 ming dona yengil avtomobil ishlab chiqarildi, bu 2024-yilning shu davridagi ko‘rsatkichdan 4,61% ko‘pdir.
Mamlakatda ishlab chiqarilgan har uch avtomobildan biri Chevrolet Cobalt bo‘lib, uning ishlab chiqarilishi atigi 0,2% ga oshib, 73,1 ming donaga yetdi. Cobalt ishlab chiqarish hajmi 2024-yilning tegishli davrlariga nisbatan ketma-ket uch oy davomida pasaymoqda: aprel oyida 6% ga, may oyida 10,6% ga, iyun oyida esa 7,84% ga kamaydi.
Ishlab chiqarish hajmi bo‘yicha ikkinchi o‘rinda Damas saqlanib qolmoqda — 45,9 ming dona avtomobil (+18,1%). Chery’da salbiy dinamika qayd etildi (-0,7%) — 4161 ta avtomobil. Onix ham o‘z ko‘rsatkichlarini 1% ga pasaytirib, 17,24 ming donagacha tushirdi.
Tracker ishlab chiqarish hajmi 22,84 ming avtomobilgacha o‘sib (+6,3%), Kia avtomobil ishlab chiqarishni 26,9% ga ko‘paytirib, 11,76 ming donaga yetkazdi. Haval esa ishlab chiqarishni 6,5 barobarga oshirib, 3538 ta yengil avtomobil chiqardi. Bundan tashqari, Jizzax viloyatidagi BYD zavodi 7000 ta elektromobil ishlab chiqardi.
O‘zavtosanoat ma’lumotlariga ko‘ra, yarim yil davomida 172,2 mingdan ortiq avtomobil sotilgan. UzAuto Motors’ning bozordagi ulushi 54,6% gacha pasaygan bo‘lib, keyingi o‘rinlarni Xorazm Avto (27,8%), ADM Jizzax (11,4%) va BYD O‘zbekiston zavodi (5,6%) egallagan. Qolgan uchta ishlab chiqaruvchining umumiy ulushi 0,6 foizdan oshmagani qayd etilgan.
Brendlar orasida Chevrolet yetakchilikni saqlab qolmoqda — 141,9 mingdan ziyod avtomobil (taxminan yarmi Cobaltga to‘g‘ri keladi). Kia savdosi 11,36 ming avtomobilga yetdi, BYD esa 9708 ta elektromobil sotdi. Eng yaxshi beshlikka Chery va Haval ham kirdi — mos ravishda 4614 va 3697 ta yengil avtomobil bilan.
Modellar kesimida birinchi beshta o‘rinni Chevrolet Cobalt, Damas, Tracker, Labo va Onix egalladi — ular jami sotuvlarning 81,7 foizdan ortig‘ini tashkil etadi. Shuningdek, o‘ntalikka Kia Sonet, uchta BYD va Haval M6 modellari kirdi.
Avvalroq Spot yarim yilda yengil avtomobillar savdosi kamaygani haqida yozgandi.
Joriy yilning birinchi yarmida 446 mingta yengil avtomobil sotilgan bo‘lib, bu o‘tgan yilning shu davriga qaraganda 23%ga kam.
