O‘zbekiston yetti oyda butun 2024-yilga nisbatan ko‘proq oltin eksport qildi, deyiladi Milliy statistika qo‘mitasi hisobotida.
O‘tgan oyda O‘zbekiston iyun pauzasidan keyin oltin eksportini tikladi — $1,09 mlrd. Avvalroq yetkazib berish hajmi: fevralda — $1,73 mlrd, martda — $1,84 mlrd, aprelda — $1,91 mlrd, mayda — $1,01 mlrdni tashkil etgandi.
Yanvar-iyul oylari yakunlariga ko‘ra, qimmatbaho metall yetkazib berish $7,58 mlrdni tashkil etdi — yillik o‘sish 80,9%. Natijada yetti oy ichida eksport o‘tgan yilgi ko‘rsatkichdan ($7,48 mlrd) oshdi.
Biroq, oltin eksporti 2023-yildagi ko‘rsatkichdan past, o‘shanda O‘zbekiston qimmatbaho metalni rekord darajadagi 8,15 mlrdga sotgan edi.
Iyun oyida O‘zbekiston oltin strategiyasini o‘zgartirdi. Markaziy bank sotishdan xarid qilishga o‘tib, bir oy ichida 9 tonna oltin bilan dunyodagi eng yirik xaridorga aylandi. Bundan avval markaziy bank to‘rt oy davomida qimmatbaho metalni uzluksiz sotgan edi. Yil boshidan beri O‘zbekiston oltin sotishda yetakchilik qilmoqda — yarim yil ichida 18 tonna oltin.
Iyul oyida O‘zbekistonning oltin-valyuta zaxiralari $193,7 mlnga oshib, $48,74 mlrdni tashkil etdi. Markaziy bank omborlaridagi oltin narxi rekord darajadagi $38,68 mlrdga ko‘tarilib, o‘tgan oyda $265 mlnga oshdi. Shu bilan birga, oltin zaxirasining fizik hajmi o‘zgarishsiz qoldi — 11,7 mln troya unsiyasi. Valyuta zaxiralari $63,3 mlnga kamayib, $9,5 mlrddan pastga tushdi.
Birinchi yarim yillikda NKMK 60,8 trln so‘mlik mahsulot ishlab chiqardi — bu o‘tgan yilning shu davriga nisbatan 44% ga ko‘pdir. Oltin ishlab chiqarish hajmi 1,53 mln troya unsiyasini tashkil etdi, bu yilga nisbatan 1,4% ga ko‘pdir.
Avvalroq Spot Navoiyda oltin zaxirasi 6 tonnaga baholangan Temirchi koni 67,78 mlrd so‘mga sotilgani haqida yozgandi.
Savdoda bir oy oldin tashkil etilgan 10 mln so‘mlik ustav fondiga ega Zauris kompaniyasi g‘olib bo‘ldi.
