O‘zbekistonda Shavkat Mirziyoyevni tinchlik bo‘yicha Nobel mukofotiga nomzod qilib ko‘rsatish taklif qilindi. Tegishli tashabbusni 20-avgust kuni prezidentning tadbirkorlar bilan har yilgi ochiq muloqotida Alkogolsiz ichimliklar va sharbatlar ishlab chiqaruvchilar uyushmasi (UzBev) ijrochi direktori Alfiya Musina ilgari surdi.
U so‘nggi ikki yil mobaynida prezidentning salqin ichimliklar ishlab chiqaruvchilarning muammolariga bo‘lgan e’tiboridan hayratga tushganini ta’kidladi. Shuningdek, u prezidentning bu masalalarga chuqur va puxta yondashganini alohida qayd etdi.
Alfiya Musina ochiq muloqot formatidan taassurotlandi: oldingi qatorlarga tadbirkorlar, ularning orqasiga esa Vazirlar Mahkamasi a’zolari, senatorlar va boshqa amaldorlar joylashtirilgandi. “Bunday formatni ilgari ko‘rmaganman,” deya ta’kidladi u, zal esa uning so‘zlarini qarsaklar bilan kutib oldi.
“Bu tadbirkorlar va biznesga qanchalik e’tibor qaratilayotganini ko‘rsatadi. Buning uchun sizga katta rahmat. Agar mening ixtiyorim bo‘lganda, men sizni tinchlik bo‘yicha Nobel mukofotiga tavsiya etgan bo‘lardim”, — dedi Musina.
“Shunchaki Markaziy Osiyo va Kavkaz qardosh xalqlarini birlashtirganingiz uchun. Siz Qozog‘iston prezidenti bilan o‘zaro yaxshi munosabatda ekanligingizni aytayapsiz. Yo‘q, Shavkat Miromonovich, siz qo‘shni va qo‘shni bo‘lmagan davlatlarning barcha prezidentlari va rahbarlari bilan yaxshi munosabatdasiz. Shuning uchun sizga minnatdormiz,” — deya yakunladi u.
So‘zining yakunida Alfiya Musina Shavkat Mirziyoyevga yana bir bor chuqur minnatdorchilik bildirib, unga 100 yillik umr tiladi. “Biz bilan birga bo‘ling. Agar siz biz bilan bo‘lsangiz, bizga hech narsa qo‘rqinchli emas”, deya yakunladi UzBev rahbari.
Prezident Alfiya Musinani “Do‘stlik” ordeni bilan taqdirlash taklifini bildirdi va bu taklifni “samimiy” deb ta’rifladi. Mirziyoyev Alkogolsiz ichimliklar va sharbatlar ishlab chiqaruvchilar uyushmasi a’zolarining O‘zbekistonga faol sarmoya kiritayotgani uchun Musinaga minnatdorchilik bildirib, investitsiyalarni yanada ko‘paytirishga da’vat etdi.
So‘nggi paytlarda AQSh prezidenti Donald Trampning tinchlikparvarlik sa’y-harakatlari uchun Nobel tinchlik mukofotini olishga intilayotgani fonida ushbu mukofot haqida tobora ko‘proq so‘z yuritilmoqda. Oq uy ma’lumotlariga ko‘ra, Armaniston va Ozarbayjon ham qatori yetti davlat Trampni Nobel tinchlik mukofotiga nomzod etib ko‘rsatgan. AQSh prezidenti o‘z yozishmicha, yarim yil ichida 6 ta urushni yakunlashga erishgan.
Avvalroq Spot Shavkat Mirziyoyev bir guruh tadbirkorlarga mukofotlarni topshirgani haqida yozgandi.
Bular qatorida Zafar Hoshimov, Jahongir Ortiqxo‘jayev, Nikoloz Kurdiani, Ulug‘bek Rustamov hamda Shuhrat Ergashev kabilar bor.
