O‘zbekistonda avtomobil ishlab chiqarish dastlabki yetti oyda o‘tgan yilning shu davriga nisbatan 3,5% ga o‘sdi. Bu ma’lumot Milliy statistika qo‘mitasining hisobotida keltirilgan.
Mahalliy zavodlar yil boshidan beri 212,1 ming dona avtomobil ishlab chiqardi. Bozorning eng katta ulushi hamon UzAuto Motors kompaniyasiga tegishli, biroq BYD, KIA va boshqa yangi brendlarning kirib kelishi bilan bu ulush asta-sekin qisqarmoqda.
Ishlab chiqarish hajmining uchdan bir qismidan ko‘prog‘ini — 83,1 mingta avtomobilni Chevrolet Cobalt modeli ta’minladi. Shu bilan birga, o‘tgan yilga nisbatan ishlab chiqarish 1,9% ga kamaydi.
Iyul oyida 10 165 ta Cobalt avtomobili ishlab chiqarilgan. Ishlab chiqarish ketma-ket to‘rtinchi oy pasaymoqda va yanvar oyidan beri eng past ko‘rsatkichga yetib, iyun oyiga nisbatan 29,1% ga va 2024-yil iyuliga nisbatan 14,7% ga kamaydi.
Ikkinchi o‘rinni 51,5 ming dona bilan Damas egalladi, bu o‘tgan yilga nisbatan 5,5% ko‘pdir. Biroq iyul oyida ishlab chiqarish oldingi oylarga qaraganda sezilarli darajada kamayib, 5595 donani tashkil etdi. Shunga qaramay, o‘tgan yilning iyul oyiga nisbatan deyarli ikki barobar oshdi.
Yetakchilar uchligini 26 385 ta avtomobil bilan Tracker yakunladi, bu o‘tgan yilgi ko‘rsatkichdan deyarli 13% ga yuqori. O‘tgan oyda konveyerlardan 3538 ta krossover tushdi — bu iyun oyiga nisbatan to‘rtdan bir qismga kam bo‘lsa-da, o‘tgan yilning iyul oyiga nisbatan 84% ko‘pdir.
Onix ishlab chiqarish yil boshidan beri 2,7% ga oshib, 18 238 ta avtomobilga yetdi. U iyul oyida o‘sishni ko‘rsatgan yagona Chevrolet modeli bo‘lib, 1485 ta avtomobil (+43,6%) ishlab chiqarildi.
Boshqa brendlar orasida yetakchi o‘rinni yetti oy ichida barcha modellardagi 14,4 ming avtomobil (+27,6%) bilan KIA egallaydi. O‘tgan oyda ularning ishlab chiqarilishi 2656 donani tashkil etib, iyun oyiga nisbatan 1,5 baravar va o‘tgan iyul oyiga nisbatan 30% ga oshdi.
2024-yilning yozida ishga tushirilgan BYD Uzbekistan Factory zavodi yetti oy ichida 8601 dona avtomobil ishlab chiqardi. Ulardan 1601 tasi iyul oyida chiqdi va oylik ishlab chiqarish rekordini yangiladi. Haval, shuningdek, bir oy ichida ishlab chiqarishni 887 taga yetkazdi va yil boshidan buyon 4,4 ming dona avtomobil ishlab chiqardi.
Chery ishlab chiqarishi o‘tgan yilgi ko‘rsatkichga nisbatan biroz kamayib, 4838 ta avtomobilni tashkil etdi (-0,3%). Biroq, iyul oyida bu markadagi mashinalar ishlab chiqarishi iyun oyiga nisbatan 8% ga kamaygan.
Avvalroq Spot UzAuto Motors yangi modelni e’lon qilgani va u qanday bo‘lishi mumkinligi haqida xabar bergandi.
