Sun’iy intellekt AQShda yosh mutaxassislarni ish bilan ta’minlashni qiyinlashtirmoqda. Bu haqda Bloomberg Stenford universiteti tadqiqotiga tayanib xabar bermoqda.
Ayniqsa, buxgalteriya, dasturlash va ma’muriy qo‘llab-quvvatlash kabi kasblar zarar ko‘rmoqda. So‘nggi uch yilda ushbu sohalarda ish boshlayotgan mutaxassislar bandligi 13% ga kamaygan.
Ayni paytda, ushbu sohalarda ko‘proq tajribaga ega bo‘lgan mutaxassislar uchun 22 yoshdan 25 yoshgacha bo‘lgan xodimlar orasida ishga qabul qilish sur’ati sekinlashganiga qaramay, bandlik barqaror qoldi.
Shu bilan bir vaqtda, kamroq texnologik sohalarda, masalan, tibbiyot xodimlarining yordamchilari orasida ish o‘rinlari soni ortganligi kuzatildi.
Tadqiqot mualliflari — iqtisodchi Erik Brinyolfson va Stenford raqamli iqtisodiyot laboratoriyasi mutaxassislari ta’kidlashicha, olingan ma’lumotlar sun’iy intellekt boshlang‘ich mutaxassislar mehnatining o‘rnini bosadigan tendensiyani aks ettiradi, ularning samaradorligini oshirish vositasiga aylanmaydi.
Tahlil uchun o‘n minglab kompaniyalar xodimlarining ish haqi qaydnomalarini qayta ishlovchi Automatic Data Processing Inc. (ADP) kompaniyasining hisobotlaridan olingan statistik ma’lumotlardan foydalanildi. Shuningdek, ushbu tadqiqot hali ekspertlar tomonidan ko‘rib chiqilish jarayonidan o‘tmagan.
Iyul oyida AQSh IT kompaniyalari 2025-yilda sun’iy intellekt tufayli 94 ming xodimini ishdan bo‘shatgani haqida xabar berilgandi.
Qayd etilishicha, ommaviy qisqartirishlar yanvar oyidan boshlanib, Microsoft, IBM, Amazon kabi yirik korporatsiyalarga ta’sir ko‘rsatdi.
Texnologiya kompaniyalari o‘z faoliyatida sun’iy intellektni keng joriy qilayotgani sababli ommaviy qisqartirishlarni amalga oshirmoqda.
Ayrim kompaniyalar ishdan bo‘shatishni bir necha bosqichda amalga oshirgan bo‘lib, xodimlarni sun’iy intellekt texnologiyalari bilan almashtirishni davom ettirish niyatlarini bildirmoqda.
Qisqartirishlar avvalo kadrlar bo‘yicha mutaxassislar, qo‘llab-quvvatlash xizmatlari, kontent mualliflari va ish beruvchilar nazarida sun’iy intellekt yordamida osonroq avtomatlashtirilishi mumkin bo‘lgan boshqa lavozimlarga ta’sir qildi.
Avvalroq Spot OpenAI o‘smirning o‘limi bo‘yicha sud jarayoni sababli ChatGPT’ni yangilashi haqida yozgandi.
Da’voda ChatGPT uzoq davom etgan muloqotlarda xavfli maslahatlar bergani va o‘smirning holatini og‘irlashtirganiga oid ayblovlar keltirilgan.
