Osiyo taraqqiyot banki (OTB) Transkaspiy xalqaro transport yo‘lagining (O‘rta yo‘lak) muhim qismini modernizatsiya qilish uchun O‘zbekistonga 233,1 mln qarz ajratishni ma’qulladi.
Loyihaning umumiy qiymati $293,7 mlnni tashkil etib, O‘zbekiston hukumati $60,6 mln miqdorida hissa qo‘shadi.
O‘rta yo‘lakning barqarorligini oshirish va modernizatsiya qilish loyihasi Qoraqalpog‘istondagi G‘uzor-Buxoro-Nukus-Beyneu (A380) avtomobil yo‘lining taxminan 87 km qismini rekonstruksiya qilishni nazarda tutadi.
Loyiha doirasida 75 km uzunlikdagi yangi To‘rtko‘l-Ellikqal'a-Beruniy aylanma yo‘li qurilishi hamda mavjud A380 avtomobil yo‘lining 12 km qismini qayta qurish rejalashtirilgan.
U iqlimga chidamli yechimlar, jumladan, sement-beton qoplamalar, baland ko‘tarmalar va takomillashtirilgan drenaj tizimlarini joriy etishni nazarda tutadi. Bu esa, iqlim ta’siri va ekstremal ob-havo sharoitlariga chidamlilikni oshiradi.
Mazkur investitsiya O‘zbekistonning mintaqaviy tranzit markazi sifatidagi o‘rnini mustahkamlaydi va Qoraqalpog‘istonda inklyuziv iqtisodiy o‘sishni qo‘llab-quvvatlaydi.
Iqlimga chidamli infratuzilma va aqlli transport tizimlarini qo‘llash orqali loyiha uzoq muddatli barqarorlikni ta’minlashga xizmat qiladi, shu bilan birga, aholi va tadbirkorlar uchun xavfsizroq va samaraliroq harakatlanish imkoniyatini yaratadi.
Shuningdek, loyihada yo‘lak bo‘ylab beshta dam olish va xizmat ko‘rsatish maskani tashkil etilishi ko‘zda tutilgan. Ularda, jumladan, elektromobillarni quvvatlash shoxobchalari hamda ayollar uchun xavfsiz va qulay sharoitlar yaratiladi.
Avvalroq Spot O‘zbekiston suv ta’minotini raqamlashtirish uchun OTBdan $125 mln jalb qilgani haqida yozgandi.
Mablag‘lar hisobidan besh yilda yirik suv inshootlari va magistral quvurlarga 4800 ta “aqlli” hisoblagich va qariyb 3000 ta telemetriya tizimi o‘rnatiladi.
