Kolleksion figuralar yaratuvchisi Labubu va Xitoyning Pop Mart kompaniyasi asoschisi Van Ning dunyoning eng boy 100 kishisi ro‘yxatida 85-o‘rinni egalladi, deya xabar bermoqda Bloomberg.
Bloomberg Billionaires Index ma’lumotlariga ko‘ra, uning mol-mulki $26,6 mlrdga yetgan. 38 yoshli Van Ning bir yil ichida o‘z aktivlarini deyarli $20 mlrdga ko‘paytirdi.
Bunday yuqori o‘sish unga milliarderlarning nufuzli jahon reytingidan joy olishini ta’minladi. Tadbirkorning asosiy daromad manbai Xitoyning “blind box” segmentidagi eng yirik kolleksion figuralar va o‘yinchoqlar ishlab chiqaruvchisi Pop Mart kompaniyasi aksiyalari bo‘ldi. Bu segmentda xaridor o‘zi sotib olayotgan Labubu figurasining qaysi versiyasini olishini oldindan bilmaydi.
Avvalroq O‘zbekistonliklar Uzum Market’dan Labubu xarid qilish uchun $110 ming sarflashgani haqida xabar berilgandi.
Marketpleysda birinchi o‘yinchoqlar may oyida paydo bo‘lgan va hozirda eng mashhur Labubu modeli allaqachon 900 dan ortiq buyurtmalarga ega. Kompaniya ma’lumotlariga ko‘ra, o‘yinchoqlar Toshkent, Samarqand, Farg‘ona, Buxoro va Navoiy kabi yirik shaharlarda eng ko‘p ommalashgan.
AQShda soxta Labubu o‘yinchoqlari xavfi haqida ogohlantirish berilgandi. Iste’mol tovarlari xavfsizligi bo‘yicha komissiyasi ma’lum qilishicha, qalbaki qo‘g‘irchoqlar bolalar salomatligi uchun xavf tug‘diradi va bo‘g‘ilish xavfini keltirib chiqaradi.
Internetda Lafufu nomi bilan mashhur bo‘lgan soxta qo‘g‘irchoqlar, asl Labubu — ko‘pincha yopiq qutilarda sotiladigan kichik yumshoq o‘yinchoqlarning ommalashuvi bilan bir vaqtda bozorda paydo bo‘la boshladi.
Ijtimoiy tarmoqlar o‘yinchoqlarni ochish videolari bilan to‘lib ketdi va haqiqiy Labubuga bo‘lgan talab oshgani sababli, qalbaki mahsulotlar taklifi ham ko‘payib ketdi.
Labubu haqida
Labubu o‘yinchoqlari 2019-yilda paydo bo‘lgan bo‘lsa-da, 2025-yilga kelib nafaqat Osiyoda, balki Yevropada ham haqiqiy hitga aylandi. O‘tkir tabassum bilan ajralib turadigan bu qiziqarli mavjudotlar nafaqat bolalar, balki katta yoshli kolleksionerlar va moda ishqibozlari orasida ham tez orada ommalashib ketdi. Do‘konlarda navbatlar paydo bo‘ldi, sotuvlar esa rekord darajaga ko‘tarildi.
O‘yinchoqlarini ishlab chiqaruvchi Pop Mart kompaniyasining asoschisi, 38 yoshli Van Ning Forbes reytingiga ko‘ra birinchi marta Xitoyning eng boy odamlari o‘ntaligiga kirdi. U ByteDance asoschisi Chjan Imin va Tencent hammuassisi Ma Xuaten ham kiritilgan ushbu ro‘yxatning eng yosh ishtirokchisi hisoblanadi.
