Iyul oyida Tesla’ning Yevropadagi sotuvlari ketma-ket yettinchi oy davomida pasaymoqda. Bu haqda CNBC nashri Yevropa avtomobil ishlab chiqaruvchilar uyushmasi (ACEA) ma’lumotlariga asoslanib xabar berdi.
O‘tgan oyda yangi Tesla elektromobillarini ro‘yxatdan o‘tkazish soni 8837 tani tashkil etib, o‘tgan yilga nisbatan 40% ga pasaydi. Xitoyning BYD kompaniyasi uchun bu ko‘rsatkich 13 503 ta elektromobilga yetib, o‘tgan yilga nisbatan 225% ga oshdi.
New York Post xabar berishicha, kompaniya salonlarni tez ochish va yangi modellarni bozorga chiqarish orqali Yevropa bozorini “egallab olishga” erishdi.
Tesla Xitoy brendlari tomonidan “qattiq” raqobatga duch kelmoqda va modellar qatorini yangilayotgani yo‘q, deya ta’kidlaydi nashr.
Shuningdek, Tesla rahbari Ilon Maskning “noaniq” obro‘si kompaniya elektromobillari savdosiga salbiy ta’sir ko‘rsatmoqda.
BYD birinchi marta Yevropadagi sotuvlar bo‘yicha Teslani 2025-yil aprel oyida ortda qoldirdi. Xitoy kompaniyasi 7231 ta, Amerika kompaniyasi 7165 ta elektromobilni ro‘yxatdan o‘tkazgan.
2025-yilning ikkinchi choragi yakunlariga ko‘ra, Teslaning sof foydasi 16% ga kamayib, $1,17 mlrdni tashkil etdi. Umumiy daromad o‘tgan yilga nisbatan 12% ga kamayib, $22,5 mlrdni tashkil etdi.
Avvalroq Spot Tesla kompaniyasi reklamadagi yolg‘on uchun sudga berilgani haqida yozgandi.
Da’vogarlarning fikricha, avtomobil ishlab chiqaruvchisi o‘z elektromobillarining imkoniyatlarini bo‘rttirib ko‘rsatgan.
