Avvalroq sentabr oyida Afg‘onistonning KAM Group va O‘zbekistonning Railcom kompaniyalari Toti-Maydon konida gaz qidirish va qazib olish bo‘yicha 25 yillik shartnoma imzolagani haqida xabar berilgandi.
Afg‘oniston hukumati O‘zbekiston kompaniyalariga o‘z hududida geologiya-qidiruv ishlarini olib borish va uglevodorodlarni qazib olish uchun litsenziya berdi. Bu haqda energetika vaziri Jo‘rabek Mirzamahmudov O‘zbekiston 24 telekanaliga bergan intervyusida ma’lum qildi.
Vazirning so‘zlariga ko‘ra, joriy yilning 14-sentabr kuni Toti-Maydon hududida amaliy ishlar boshlangan. Bu esa, Mirzamahmudovning ta’kidlashicha, loyihaning birinchi bosqichi hisoblanadi.
“Natijalari asosida loyihani kengaytirish, yangi maydonlarda birgalikda ishlash, shuningdek, [loyihani] O‘zbekiston va Afg‘oniston iqtisodiyotiga samara keltiradigan loyiha sifatida amalga oshirish ko‘zda tutilgan. Va yana bir narsa: kelajakda u yerda tinchlik bo‘lishi, iqtisodiyot va infratuzilma rivojlanishi [orqali] biz uchun Afg‘onistonning ushbu hududi tranzit salohiyati sifatida dunyo okeaniga eng yaqin chiqish nuqtasiga aylanadi”, — dedi vazir.
Jo‘rabek Mirzamahmudovning qo‘shimcha qilishicha, ushbu marshrut O‘zbekistonga iqtisodiy o‘sish va logistika imkoniyatlaridan foydalanishni yanada kengaytiradi.
Shuningdek, u Afg‘oniston bilan amalga oshiriladigan bu kabi loyihalar uzoq muddatli istiqbolda o‘z natijasini berishini qayd etdi.
Afg‘oniston Geologiya vazirligi ma’lumotlariga ko‘ra, Juzjon viloyatidagi Toti-Maydon gaz konlari 7500 kv.km maydonni egallaydi, ularda hozirda 30 ga yaqin quduqlar mavjud.
2024-yil may oyida O‘zbekiston kompaniyalari Afg‘onistonda neft qazib olishga qiziqish bildirgan edi. Masalan, Eriell Group uglevodorodlarga qiziqish bildirgan.
Oktabr oyida Afg‘oniston Tog‘-kon sanoati va neft vazirligi va O‘zbekistonning qandaydir kompaniyasi (nomi ko‘rsatilmagan) Shimoliy Juzjon viloyatidagi Toti-Maydon uchastkasida gaz razvedkasi va qazib olish bo‘yicha shartnoma imzoladi.
Shartnoma 10 yil muddatga tuzilgan. Birinchi yilda kompaniya $100 mln, o‘n yil ichida esa taxminan $1 mlrd investitsiya kiritadi. Dastlabki ikki yilda o‘zbekistonlik investor qazib olinayotgan gazdan 100 MVt elektr energiyasi ishlab chiqarmoqchi.
Joriy yilning fevral oyida bosh vazir o‘rinbosari Jamshid Xo‘jayev o‘zbekistonlik investorlar Afg‘oniston bilan neft va gaz konlarini qidirish va qazib olishda hamkorlik qilishga, sanoat sohasiga, jumladan, Samangan viloyatida sement zavodi tashkil etishga sarmoya kiritishga tayyorligini ma’lum qilgandi.
Shuningdek, bosh vazir o‘rinbosari Toti-Maydon gaz konini qidirishda “sezilarli yutuqlarga erishilganini” ta’kidladi, u yerda “yaqin kelajakda” qazib olish ishlari boshlanishi kutilmoqda.
Avgust oyida Afg‘oniston bosh vazirining iqtisodiy masalalar bo‘yicha o‘rinbosari Mulla Abdul G‘ani Barodar va O‘zbekiston energetika vaziri Jo‘rabek Mirzamahmudov energetika sohasidagi hamkorlikni muhokama qilgan edi.
Avvalroq Spot O‘zbekiston Iordaniyaga uran va muhim minerallar konlarini qidirishda yordam berishi haqida yozgandi. Tomonlar, shuningdek, mis va nodir metallarni qazib olish sohalarida hamkorlik qiladi.
