Shavkat Mirziyoyev 6-oktabr kuni mamlakatda sunʼiy intellekt texnologiyalarini rivojlantirish hamda ularni iqtisodiyot va ijtimoiy sohalarga keng joriy etish yuzasidan taqdimot bilan tanishdi. Bu haqda prezident matbuot xizmati xabar berdi.
O‘zbekiston sunʼiy intellektni tatbiq etish bo‘yicha xalqaro reytingda 17 pog‘ona yuqorilab, hozirda 188 davlat ichida 70-o‘rinni, Markaziy Osiyo bo‘yicha esa birinchi o‘rinni egallaydi. Prezident bu natijalar sohada qo‘yilgan dastlabki qadamlar natijasi ekanligi, qiladigan ishlar ko‘pligini taʼkidladi.
Taqdimotda sohani rivojlantirishning ustuvor yo‘nalishlari ko‘rib chiqildi. Iqtisodiyot va ijtimoiy sohalarda sunʼiy intellekt loyihalarini joriy etish uchun $50 mln mablag‘ ajratilgan. Sog‘liqni saqlash, taʼlim, qishloq xo‘jaligi, energetika, transport, ekologiya va moliya sohalarini o‘z ichiga oluvchi 86 ta loyiha shakllantirildi.
Hozirda sunʼiy intellektni qo‘llash uchun zarur hisoblash imkoniyatlarini yaratish maqsadida “superkompyuter klasteri"ni tashkil etish ishlari “jadal olib borilayotgani” ta’kidlandi.
“Sunʼiy intellektni tezroq rivojlantirish uchun doimiy ravishda ilg‘or, o‘zini oqlagan xorijiy va mahalliy tajribalarni o‘rganib borish zarur. Buning uchun sohada samarali faoliyat yuritayotgan vatandoshlarimiz, xorijiy ekspertlar va xususiy sektor bilan yaqin hamkorlikni yo‘lga qo‘yish kerak”, — dedi davlat rahbari.
Taqdimotda sunʼiy intellekt sohasida zamonaviy hisoblash quvvatlarini mamlakatda yaratish, maʼlumotlar markazlarini qurish va bunga investitsiya kiritmoqchi bo‘lgan tadbirkorlar uchun jozibador muhitni taʼminlash muhimligi qayd etildi.
Sunʼiy intellektni rivojlantirishda eng muhim omil malakali kadrlarni tayyorlash ekanligi aytildi. Buni maktablardan boshlash, informatika o‘qituvchilarini qayta tayyorlash, yangi avlod darsliklarini ishlab chiqish zarurligi taʼkidlandi.
Mamlakatda Bir million sunʼiy intellekt yetakchilari dasturi doirasida yoshlar uchun aistudy.uz va omp.aistudy.uz platformalari ishga tushirildi, ularda SI bo‘yicha 5 ta bepul onlayn o‘quv dasturi yo‘lga qo‘yilgan. Dastur doirasida 2027-yilgacha 1 mln nafar yosh sunʼiy intellekt sohasidagi bilim va ko‘nikmalarga ega bo‘ladi.
Yoshlarning istiqbolli loyihalarini aniqlash va qo‘llab-quvvatlash uchun barcha hududlarda Sunʼiy intellekt xakatoni yo‘lga qo‘yiladi.
Muloqotda sog‘liqni saqlash bo‘yicha Nukusda o‘tkazilgan HealthTech AI Hackathon musobaqasini kengaytirib, taʼlim, sud tizimi, suv xo‘jaligi va tadbirkorlikni rivojlantirish yo‘nalishlarida ham o‘tkazish muhimligi qayd etildi.
Prezident taqdimot qilingan chora-tadbirlarni qo‘llab-quvvatlab, ularni sunʼiy intellektni joriy etishni yana-da tezlashtirish, ilg‘or tajribani amaliyotga tatbiq etish, sohada kadrlar salohiyatini oshirish yo‘nalishida yana-da takomillashtirish va kengaytirish bo‘yicha topshiriqlar berdi.
2024-yilning oktabrida O‘zbekistonda sun’iy intellektni rivojlantirish strategiyasi tasdiqlangandi. Unga ko‘ra, 2030-yilgacha sun’iy intellekt asosidagi dasturiy mahsulot va xizmatlar hajmini $1,5 mlrdga yetkazish rejalashtirilmoqda.
Joriy yilning iyulida Bir million sun’iy intellekt yetakchilari dasturi ishga tushirildi. U orqali sun’iy intellekt sohasidagi beshta asosiy yo‘nalish bo‘yicha amaliy ko‘nikmalarni bepul o‘zlashtirish mumkin.
Spot, avvalroq, O‘zbekistonda top-30 sunʼiy intellekt liderlari reytinggi tuzilgani haqida yozgandi. Undan MyTaxi asoschisi Akmal Paiziev, Mohirdev asoschisi Anvar Narzullayev, raqamli texnologiyalar vazirining birinchi o‘rinbosari Oleg Pekos va boshqalar o‘rin olgan.
