2025-yilning yanvar-sentabr oylarida O‘zbekiston iqtisodiyotining o‘sishi sezilarli darajada tezlashdi. Bu haqda Milliy statistika qo‘mitasi ma’lumotlarida keltirilgan.
To‘qqiz oyda mamlakat yalpi ichki mahsulotining o‘sishi 7,6% ni tashkil etdi, bu ko‘rsatkich 2024-yilning mos davriga (6,6%) nisbatan 1 foiz punktga ko‘p.
Inflyatsiya (iste'mol narxlari indeksi) o‘tgan yilgi 6,8% dan 5,1% gacha sekinlashdi. Aholining real umumiy daromadlari o‘sish sur’ati esa 7,7% dan 8,4% gacha tezlashdi.
Sanoat ishlab chiqarishning fizik hajmi indeksi biroz pasaydi — 7% dan 6,8% gacha. Qurilish ishlari hajmida sezilarli — 5,1 foiz punkt o‘sish qayd etilib, o‘tgan yilga (9,1%) nisbatan 14,2% ga oshdi.
Transport sohasida o‘sishning sekinlashishi yuk aylanmasida kuzatildi — 3,9% dan 1,6% gacha. Yo‘lovchi aylanmasi biroz (5,9%) o‘sgan.
Shuningdek, chakana savdo tovar aylanmasi (11%), bozor xizmatlari (14%), qishloq, o‘rmon va baliqchilik xo‘jaligi (4,1%) da o‘sish sur’atlari tezlashdi.
Tashqi savdo aylanmasi yanvar-sentabr oylarida 22,9% ga oshdi. Import bo‘yicha (6% dan 15,6% gacha) ham, eksport bo‘yicha (12,8% dan 33,3% gacha) ham o‘sish sur’atlari sezilarli darajada oshgan.
Spot, avvalroq, Markaziy bank yil yakuni bilan inflyatsiya 8% gacha pasayishini kutayotgani haqida yozgandi.
