2020-yilda Meta Facebook va Instagram ijtimoiy tarmoqlarining odamlar ruhiy salomatligiga salbiy ta’sir ko‘rsatishini aniqlagan, ammo kompaniya bu tadqiqot natijalarini e’lon qilmagan. Reuters ushbu vaziyat tafsilotlarini yoritdi.
Ma’lum qilinishicha, 2020-yilda kompaniya bir hafta davomida ijtimoiy tarmoqlardan voz kechgan foydalanuvchilarni kuzatgan. Ular “tushkunlik, xavotir, yolg‘izlik va o‘zlarini boshqalar bilan taqqoslash hissi kamayganini” bildirganlar.
Shundan so‘ng tadqiqotni to‘xtatishga qaror qilingan. Bir haftalik kuzatuv natijalari esa oshkor etilmagan.
“Bu natijalarni e’lon qilish yoki qo‘shimcha tadqiqotlar o‘tkazish o‘rniga, Meta keyingi ishlarni to‘xtatdi va tadqiqotning salbiy natijalari kompaniya atrofidagi mavjud ommaviy axborot vositalari bayonoti tufayli noto‘g‘ri talqin qilinganini ta’kidladi”, — deb xabar berdi Reuters.
Tadqiqot haqida AQSh maktab okruglarining Meta va boshqa ijtimoiy tarmoqlarga qarshi sud ishi davomida ma’lum bo‘ldi.
Jamoaviy da’voda Meta va boshqa kompaniyalar o‘z mahsulotlarining kompaniya ichida tan olingan xavflarini foydalanuvchilar, ota-onalar va o‘qituvchilardan qasddan yashirishda ayblanmoqda.
Avvalroq ijtimoiy tarmoqlardan foydalanish stressga sabab bo‘lishi haqidagi tadqiqot natijalari e’lon qilingandi.
Qayd etilishicha, ijtimoiy tarmoqlar Yer yuzi aholisining yarmidan ko‘pi hayotining ajralmas qismiga aylangan va ularning ta’siri yil sayin ortib bormoqda.
Barcha afzalliklarga qaramay, ularda o‘tkazilgan vaqt idrok va his-tuyg‘ularga jiddiy ta’sir ko‘rsatadi, tashvish va stressni keltirib chiqaradi.
