O‘zbekiston Rossiya bilan Jahon savdo tashkilotiga a’zo bo‘lish bo‘yicha muzokaralarni deyarli yakunladi. Bu haqda prezidentning JST bo‘yicha vakili Azizbek Urunov o‘zining LinkedIn’dagi sahifasida ma’lum qildi.
O‘tgan hafta Moskvada Rossiya muzokaralar guruhi bilan uchrashuv o‘tkazilib, unda O‘zbekistonning JSTga qo‘shilishi bo‘yicha hal etilmagan masalalar muhokama qilindi. O‘zbekiston tomonidan Azizbek Urunov, Markaziy bank raisi o‘rinbosari Abror Mirzo Olimov, investitsiyalar, sanoat va savdo vaziri o‘rinbosari Xurram Teshaboyev va Farmatsevtika mahsulotlari xavfsizligi markazi direktori Alisher Temirov ishtirok etdi.
“Muzokaralar deyarli yakunlandi: barcha muhim elementlar muvofiqlashtirildi va yakuniy tekshiruv va tasdiqlashni talab qiladigan bir nechta texnik jihatlar qoldi”, — dedi Azizbek Urunov.
O‘zbekiston prezidentining JST bo‘yicha vakili Rossiya Federatsiyasi iqtisodiy rivojlanish vaziri Maksim Reshetnikov, Savdo muzokaralari departamenti direktori Yekaterina Mayorova, Rossiyaning JSTdagi doimiy vakili Nikolay Platonov va boshqalarga “asosiy so‘rovlarga aniqlik kiritgani, konstruktiv ishtiroki va qo‘llab-quvvatlashi uchun” minnatdorchilik bildirdi.
Urunov joriy yilning dekabr oyida Jenevada bo‘lib o‘tadigan JST Bosh kengashi yig‘ilishida O‘zbekiston va Rossiya yakuniy natijalarni taqdim etishini ta’kidladi.
“Shu bilan bizda faqat Xitoy Taypeyi (Tayvan — Spot izohi) bilan ikki tomonlama muzokaralarni yakunlash qoldi”, — deya qo‘shimcha qildi u.
Uning qayd etishicha, Urunov shu hafta hamkasblari bilan uchrashish va JST doirasidagi hamkorlikni rivojlantirish uchun Vashingtonda bo‘ladi.
Sentabr oyida O‘zbekiston tashkilotga a’zo bo‘lish bo‘yicha uchta davlat — Argentina, Avstraliya va Gonduras bilan protokollarni imzoladi. Azizbek Urunov JSTning yana ikki a’zosi bilan prinsipial kelishuvlarga erishilganini qayd etgandi.
Oktabr oyi oxirida Yevropa Ittifoqi bilan ham muzokaralar to‘liq yakunlandi. Prezidentning JST bo‘yicha vakili Yevropa Ittifoqi oktabr oyi o‘rtalarida shartnoma imzolangan Panamadan keyin O‘zbekiston bilan ikki tomonlama muzokaralarni yakunlagan JSTning 31-a'zosi bo‘lganini ta’kidladi.
Noyabr oyi boshida O‘zbekiston Kanada va Panama bilan JSTga a’zo bo‘lish bo‘yicha muzokaralarni yakunlagani ma’lum bo‘ldi. Urunov post ostidagi izohlarda O‘zbekiston JSTga a’zo bo‘lish uchun yana uchta davlat bilan kelishib olishi kerakligini ta’kidladi. Undan keyin Ekvador bilan ham muzokaralar yakunlandi. Azizbek Urunov a’zolik uchun yana ikkita mamlakat qolganini qayd etdi.
Avvalroq Spot O‘zbekiston JSTga a’zo bo‘lish uchun qurilish materiallari bo‘yicha 166 ta xalqaro standartni qabul qilishi haqida yozgandi.
