Avtotransportlarga ekologik stikerlarni berish tartibi belgilandi. Bu haqdagi tegishli nizom hukumat qarori bilan tasdiqlandi.
Hujjatga ko‘ra, transport vositasining ekologik toifasi uning ishlab chiqaruvchi tomonidan tasdiqlangan ekologik sinfiga muvofiq belgilanadi.
Bunda transport vositalari bir qator mezonlarga ko‘ra ekologik toifalarga ajratiladi.
Benzin, siqilgan yoki suyultirilgan gazda harakatlanuvchi Yevro-2 va undan yuqori sinfdagi mashinalar “toza”, Yevro-0 va Yevro-1 sinfdagilar esa “o‘rta” ekologik toifaga kiritiladi.
Dizel dvigateliga ega transportlarda esa Yevro-4 va undan yuqorilari “toza”, Yevro-3 sinfdagilar “o‘rta”, Yevro-0, Yevro-1 va Yevro-2 sinfdagi vositalar “zararli” ekologik toifaga mansub hisoblanadi.
Gibrid va muqobil yoqilg‘ida harakatlanuvchi avtomobillar “toza” ekologik toifaga kiritiladi. Shuningdek, ishlab chiqarilganiga 3 yildan oshmagan har qanday transport vositasi ham “toza” toifaga mansub.
Transport vositalari ro‘yxatga olinganda yoki qayta ro‘yxatdan o‘tkazilganda, ularning toifasiga qarab “yashil”, “sariq” yoki “qizil” ekologik stiker beriladi.
Stikerlar Davlat yo‘l harakati xavfsizligi bo‘linmalarida ekologik operatorlar tomonidan topshiriladi.
Transport egasi ixtiyoriy ravishda ekologik stiker olish uchun IIV Jamoat xavfsizligi departamenti Yo‘l harakati xavfsizligi xizmatiga uning rasmiy veb-sayti yoki my.gov.uz orqali murojaat qiladi.
Ariza belgilangan mezonlarga muvofiq bo‘lganda, trasport vositasiga uning ekologik toifasiga mos bo‘lgan ekologik stikerlardan biri taqdim etiladi. Ekologik stikerlar muddatsiz davrga beriladi.
2024-yilning mart oyida qabul qilingan hukumat qarori bilan avtomobillarga ekologik stiker berishni nazarda tutuvchi tizim o‘sha yilning iyun oyidan boshlanishi kerak edi. Biroq, iyul oyiga kelib bu muddat joriy yilning 1-martiga ko‘chirilgandi.
Joriy yilning sentabrida qabul qilingan hukumat qarori bilan, “Ekologik transport” tizimini joriy etish muddati yana kechiktirilib, stikerlar berish 2026-yildan boshlanishi ko‘chirilgandi.
Spot, avvalroq, O‘zbekistonda elektromobil batareyalarini mahalliy ishlab chiqarish rejalashtirilayotgani haqida yozgandi.
