Ummonning UzOman investitsiya kompaniyasi O‘zbekistonda yangi bank tashkil etishni rejalashtirmoqda. Bu hadqa Investitsiyalar, sanoat va savdo vazirligi xabar berdi.
28-noyabr kuni vazir Laziz Kudratov kompaniya bosh ijrochi direktori Umar Baxram bilan uchrashdi.
Tomonlar O‘zbekiston-Ummon investitsiyaviy hamkorligining izchil rivojlanib borayotganini hamda so‘nggi yillardagi o‘zaro aloqalarning ijobiy dinamikasini qayd etdi.
Suhbat davomida UzOman ishtirokida amalga oshirilayotgan loyihalar yuzasidan fikr almashildi. Shuningdek, qo‘shma tadbirlar samaradorligini oshirish va amaliy tashabbuslar ko‘lamini kengaytirish masalalari muhokama qilindi.
O‘zaro hamkorlik tomonlar uchun yangi loyihalarni ishga tushirish va investitsiyalarni jalb etishda qo‘shimcha imkoniyatlar yaratishi alohida ta‘kidlandi. Moliyaviy sohadagi hamkorlik istiqbollariga alohida e‘tibor qaratildi.
Xususan, xorijiy hamkorlar bilan birgalikda O‘zbekistonda yangi bank tashkil etish tashabbusi muhokama qilindi. Loyihaning tashkiliy masalalari, tartibga solish jihatlari hamda uni bosqichma-bosqich puxta ishlab chiqish zarurligi ta‘kidlab o‘tildi.
Uchrashuv yakunida tomonlar institutsional aloqalarni kengaytirish va hamkorlikning asosiy yo‘nalishlari bo‘yicha axborot almashinuvini davom ettirishga tayyorligini bildirdi.
So‘nggi 2,5 yil davomida O‘zbekistonda birorta ham yangi bank tashkil etilmadi. Oxirgisi 2023-yil may oyi boshida litsenziya olgan Yangi Bank edi. Yevrosiyo banki litsenziyasi bekor qilingandan so‘ng mamlakatdagi banklar soni 35 taga qisqardi. Spot bank bozorida yangi ishtirokchilarning yo‘qligi sabablari va buning iqtisodiyotga taʼsiri haqida iqtisodchilar bilan suhbatlashgandi.
Sentabr oyida Qonunchilik palatasi O‘zbekistonda islomiy bank faoliyatini joriy etish to‘g‘risidagi qonun loyihasini birinchi o‘qishda maʼqulladi. Spot mutaxassislar bilan O‘zbekistonga islomiy banking nima uchun zarurligini, u bozorni qanday o‘zgartirishini va oddiy foydalanuvchilar uchun qanchalik foydali bo‘lishini muhokama qilgandi.
Oktabr oyida Markaziy bank bank sektorida raqobat yetarli darajada emas deb hisoblayotgani haqida xabar berilgandi.
Spot, avvalroq, Markaziy bank Tezpay va National pay to‘lov tashkilotlarining litsenziyasini yarim yilga to‘xtatgani haqida yozgandi.
