Coca-Cola bosh direktori Jeyms Kuinsi lavozimidan ketmoqda. Bu haqda kompaniya matbuot xizmati xabar berdi.
2026-yil mart oyining oxirida Enrike Braun yangi bosh direktor bo‘ladi. Hozirda u kompaniyada bosh operatsion direktor lavozimida ishlaydi va butun dunyo bo‘ylab barcha operatsion bo‘linmalar uchun javobgar hisoblanadi.
Kuinsi kompaniyada 1996-yildan beri ishlaydi, 2017-yilda uning bosh direktori, 2019-yilda esa direktorlar kengashi raisi bo‘ldi. Iste’foga chiqqandan so‘ng, u ijrochi rais lavozimiga o‘tadi.
Bunday kadrlar o‘zgarishi oldindan rejalashtirilgan va vorislik strategiyasining bir qismi hisoblanadi.
Rasmda: Jeyms Kuinsi (chap tarafda), Enrike Braun (o‘ng tarafda).
Kuinsi rahbarligi davrida (2017−2025 yillar) Coca-Cola o‘z mahsulotlar portfelini sezilarli darajada kengaytirdi: yangi mahsulotlar, milliard dollarlik brendlar paydo bo‘ldi.
Shuningdek, shakarsiz va past kaloriyali ichimliklarga, shuningdek, gazlanmagan ichimliklarga alohida e’tibor qaratildi. Uning boshqaruvi ostida Coca-Cola aksiyalari 60% dan ortiqqa o‘sdi.
Avvalroq Apple 2026-yil boshida rahbariyatda katta o‘zgarishlar bo‘lishini e’lon qilgandi.
Yanvar oyi oxirida kompaniyani atrof-muhit masalalari bo‘yicha vitse-prezident Liza Jekson tark etadi, uning ortidan esa bosh huquqshunos Keyt Adams nafaqaga chiqadi.
O‘zgarishlar shu bilan tugamaydi. Keyingi yil boshida kompaniya Apple Intelligence’ni ishlab chiqish uchun mas’ul bo‘lgan katta vitse-prezident Jon Jannandrea bilan xayrlashmoqda.
Apple bosh direktori Tim Kukning o‘zi ham, mish-mishlarga ko‘ra, 2026-yil boshida, joriy moliyaviy chorakdagi foyda haqida hisobot berganidan so‘ng darhol o‘z lavozimini tark etadi.
Uning o‘rniga asosiy nomzod Apple kompaniyasining apparat ta’minoti bo‘yicha katta vitse-prezidenti Jon Ternus bo‘lib qolmoqda.
